అల్లు అర్జున్ జెండా ఎగరేశాడు

ఒకసారి చూపించిన లొకేషన్ ఇంకోసారి చూపిస్తే బోర్ కొట్టేస్తుంది మన ప్రేక్షకులకు. అందుకే ఎప్పటికప్పుడు కొత్త లొకేషన్ల కోసం అన్వేషణ సాగిస్తూనే ఉంటారు మన దర్శకులు, నిర్మాతలు. నెవర్ బిఫోర్ సీన్ లొకేషన్లలో పాటలు, సన్నివేశాలు తీసి.. ప్రేక్షకుల్ని సర్ ప్రైజ్ చేయాలని చూస్తుంటారు ఫిలిం మేకర్స్. ‘సరైనోడు’ టీమ్ కూడా ఆ ప్రయత్నంలో భాగంగానే దక్షిణాఫ్రికాలోని బొలీవియాకు వెళ్లింది. ఈ ప్రాంతంలో ఇప్పటిదాకా ఏ ఇండియన్ మూవీ షూటింగ్ జరగలేదు. రోబో-2 సినిమా యూనిట్ సభ్యులు కూడా ఇక్కడి వెళ్లాలని అనుకుంటుండగానే అల్లు అర్జున్ అండ్ కో అక్కడి వెళ్లిపోయింది. రెండు పాటల చిత్రీకరణ కూడా పూర్తి చేసుకుని ఇండియాకు బయల్దేరేసింది.

‘సరైనోడు’ టీమ్ బొలీవియాకు వెళ్తున్నప్పటి ఫొటో కొన్ని రోజుల ముందే సోషల్ మీడియాలో హల్ చల్ చేసిన సంగతి తెలిసిందే. ఇంతలోనే అక్కడ షూటింగ్ పూర్తి చేసుకుని.. లొకేషన్ నుంచి ‘సరైనోడు’ టీమ్ అంతా ఫొటోలు దిగి.. వాటిని కూడా సోషల్ మీడియాలో షేర్ చేసింది. హీరో హీరోయిన్లు అల్లు అర్జున్, రకుల్ ప్రీత్ సింగ్, డైరెక్టర్ బోయపాటి శ్రీనులతో పాటు ఓ పాతిక మంది దాకా ఉన్నారు యూనిట్లో. అల్లు అర్జున్ ఇండియన్ ఫ్లాగ్ పట్టుకుని యూనిట్ సభ్యులతో కలిసి ఫొటోలకు పోజిచ్చాడు. ఇంతటితో ‘సరైనోడు’ షూటింగ్ దాదాపుగా పూర్తయిపోయినట్లే. ఇక పోస్ట్ ప్రొడక్షన్ కార్యక్రమాలన్నీ పూర్తి చేసి.. ఏప్రిల్ 22న థియేటర్లలోకి దిగడానికి రెడీ కానున్నాడు సరైనోడు.