ఇన్నాళ్ళకు అల్లు శిరీష్ సందడి మొదలు

మెగా ఫ్యామిలీ నుండి ‘గౌరవం’ చిత్రంతో ప్రేక్షకులకు పరిచయం అయిన అల్లు శిరీష్‌ మొదటి సినిమాతో సక్సెస్‌ ను దక్కించుకోవడంలో విఫలం అయ్యాడు. ఆ తర్వాత ‘కొత్త జంట’ చిత్రం కూడా అంతంత మాత్రంగానే నిలిచింది. అల్లు హీరో మూడవ సినిమా ‘శ్రీరస్తు శుభమస్తు’ చిత్రం పర్వాలేదు అన్నట్లుగా నిలిచింది. ఆ చిత్రం తర్వాత శిరీష్‌ చేసిన ‘ఒక్క క్షణం’ చిత్రం అంతగా ఆకట్టుకోలేక పోయింది. దాంతో కొంత గ్యాప్‌ తీసుకుని అల్లు శిరీష్‌ నటిస్తున్న చిత్రం ‘ఏబీసీడీ’.

మలయాళంలో సూపర్‌ హిట్‌ అయిన ‘ఏబీసీడీ’ చిత్రానికి ఇది రీమేక్‌ అనే విషయం తెల్సిందే. షూటింగ్‌ ప్రారంభం అయిన తర్వాత ఇప్పటి వరకు ఎలాంటి సమాచారం ఈ చిత్రం గురించి బయటకు రాలేదు. సైలెంట్‌ గా చిత్రీకరణ సాగిస్తున్న ఈ చిత్రం టైటిల్‌ లోగోను తాజాగా విడుదల చేశారు. ఇంత కాలం సైలెంట్‌ గా ఉన్న అల్లు శిరీష్‌ ఒక్కసారిగా టైటిల్‌ లోగోతో రావడం చర్చనీయాంశం అయ్యింది.

ఈ చిత్రం విడుదల తేదీపై కూడా క్లారిటీ ఇచ్చారు. ఫిబ్రవరి 8న ఈ చిత్రంను విడుదల చేయబోతున్నట్లుగా టైటిల్‌ లోగోలో తెలియజేశారు. ఒక పిట్టగోడ మీద సినిమా లోగో డిజైన్‌ ను పెట్టడంతో కథ ఎలా ఉంటుందా అనే అంచనాలు అప్పుడే మొదలయ్యాయి. ఈ చిత్రానిన మధుర శ్రీధర్‌ మరియు యాష్‌ రంగినేనిలు సంయుక్తంగా నిర్మిస్తున్నారు. ఈ చిత్రంతో సంజీవ్‌ అనే యువ దర్శకుడు పరిచయం అవుతున్నాడు. అల్లు శిరీష్‌ కు ఈ చిత్ర విజయం చాలా కీలకం. ఏబీసీడీ అల్లు వారి హీరోకు సక్సెస్‌ ను తెచ్చి పెడుతుందా అనేది చూడాలి.