అటు ఇటు మెగాస్టార్స్‌.. మ‌ధ్య‌లో అల్లు బోయ్!

`సైరా` రిలీజ్ కి ఇంకో 18 రోజుల స‌మ‌యం మాత్ర‌మే మిగిలి ఉండ‌డంతో కొణిదెల కాంపౌండ్ ప్ర‌చారంతో హీట్ పెంచేందుకు స‌న్నాహాలు చేస్తోంది. మ‌రో ఐదు రోజుల్లో (18 సెప్టెంబ‌ర్) ప్రీరిలీజ్ ఈవెంట్ .. ట్రైల‌ర్ రిలీజ్ తో అస‌లైన ప్ర‌చారం మొద‌లు కానుంది. ఈ ప‌దిహేను రోజులు ఊపిరి స‌ల‌ప‌నంత షెడ్యూల్ తో రామ్ చ‌ర‌ణ్ - సురేంద‌ర్ రెడ్డి బృందం ప్ర‌మోష‌న్స్ ని డిజైన్ చేశార‌ని తెలుస్తోంది. దాదాపు ల‌క్ష‌మంది అభిమానుల స‌మ‌క్షంలో సైరా హైద‌రాబాద్ ఈవెంట్ ని గ్రాండ్ గా ప్లాన్ చేశారు. ఈ ప్రీఈవెంట్ కి అతిధులుగా ఎస్.ఎస్.రాజ‌మౌళి- ప‌వ‌న్ క‌ల్యాణ్ విచ్చేస్తున్న సంగ‌తి తెలిసిందే.

అయితే ఈ సినిమా ప్ర‌చారానికి మేము సైతం అంటూ అల్లు హీరోలు ముందుకొస్తున్నారు. అల్లు అర్జున్ స‌పోర్ట్ ఎప్ప‌టికీ మెగాస్టార్ కి ఉంటుంది. మావ‌య్య స్ఫూర్తితోనే అత‌డు ఈ రంగంలో అడుగు పెట్టాడు. మెగావృక్షం నీడ వ‌ల్ల‌నే తాను అంత పెద్ద స్టార్ అయిన సంగ‌తిని బ‌న్ని ఎప్ప‌టికీ మ‌ర్చిపోలేడు. సైరాకు బ‌న్ని ప్ర‌చార సాయం ఎలానూ ఉంటుంది. ఇక‌పోతే .. ఈలోగానే బ‌న్ని సోద‌రుడు అల్లు శిరీష్ కూడా లైన్ లో కొచ్చాడు. ప్ర‌స్తుతం శిరీష్ ఇద్ద‌రు మెగాస్టార్ల‌తో క‌లిసి దిగిన ఓ ఫోటో సోష‌ల్ మీడియాలో వైర‌ల్ గా మారింది.

మెగాస్టార్ చిరంజీవి న‌రసింహారెడ్డి పాత్ర‌లో న‌టిస్తుండ‌గా.. ఆయ‌న గురువు గోసాయి వెంక‌న్న‌గా బాలీవుడ్ మెగాస్టార్ అమితాబ్ బ‌చ్చ‌న్ న‌టిస్తున్నారు. ఈ ఫోటోలో అటూ ఇటూ ఇరు ప‌రిశ్ర‌మ‌ల‌కు చెందిన మెగాస్టార్లు వారి గెట‌ప్పుల్లో ఉండ‌గా మ‌ధ్య‌లో న‌వ్వులు చిందిస్తూ అల్లు హీరో ఇంత‌కంటే అదృష్టం ఇంకేం ఉంటుంది అన్న‌ట్టుగానే ఫోజిచ్చారు. ఆన్ లొకేష‌న్ స్టిల్ ఇద‌ని అర్థ‌మ‌వుతోంది. ప్ర‌స్తుతం మెగాఫ్యాన్స్ సోష‌ల్ మీడియాల్లో ఇది వైర‌ల్ గా మారింది. సైరా న‌ర‌సింహారెడ్డి చిత్రాన్ని అక్టోబ‌ర్ 2న ప్ర‌పంచ‌వ్యాప్తంగా రిలీజ‌వుతోంది. తెలుగు- హిందీ- తమిళం- మళయాళం- కన్నడ భాషల్లో ప్ర‌తిష్ఠాత్మ‌కంగా రిలీజ్ చేస్తున్నారు. దేశంలోని అన్ని మెట్రోల్లోనూ వ‌రుస ఈవెంట్ల‌తో ప్ర‌చారం నిర్వ‌హించ‌నున్నారు. ప్ర‌స్తుతం చ‌ర‌ణ్ ప్రీరిలీజ్ ప‌నుల హ‌డావుడిలో ఉన్నారు. నయనతార- తమన్నా- కిచ్చ సుదీప్- జగపతిబాబు- సేతుప‌తి ఈ చిత్రంలో కీలక పాత్రలు పోషించారు.