మెగా హీరోయిన్‌ తో విష్ణు స‌ర‌దా!

విష్ణు అనుకొన్న‌ది చేసేస్తాడంతే. తాను క‌థానాయ‌కుడిగా న‌టిస్తున్న కొత్త చిత్రం `స‌ర‌దా`కోసం ముందు చెప్పిన‌ట్టుగానే అమ‌లాపాల్‌ ని తీసుకొస్తున్నాడు. కార్తీక్‌ రెడ్డి ద‌ర్శ‌క‌త్వం వ‌హిస్తున్న ఆ సినిమాలో ఓ క‌థానాయిక‌గా ఇప్ప‌టికే సోనారికా న‌టిస్తోంది. ఆమెతోపాటు మ‌రో క‌థానాయిక‌కి కూడా చోటుంద‌ని, ఆ పాత్ర‌లో ఓ ప్ర‌ముఖ క‌థానాయిక న‌టిస్తుంద‌ని ఇదివ‌ర‌కు విష్ణు వెల్ల‌డించాడు. ఆ పాత్రని కాజల్‌ తోకానీ, లేదంటే అమ‌లాపాల్‌ తోగానీ చేయించనున్న‌ట్టు కూడా అప్ప‌ట్లో చూచాయ‌గా చెప్పేవాడు. కాజ‌ల్ న‌టించొచ్చేమో కానీ... పెళ్లి చేసుకొని చెన్నైకే ప‌రిమిత‌మైన అమ‌లాపాల్ తిరిగి వ‌స్తుందా అని చాలా మంది డౌట్ ప‌డ్డారు. అయితే విష్ణు మాత్రం ఆమెకే క‌థ చెప్పి ఒప్పించేశాడు. విశ్వ‌స‌నీయ వ‌ర్గాల స‌మాచారం మేర‌కు త్వ‌ర‌లోనే అమ‌లాపాల్ స‌ర‌దా బృందంతో జాయిన్ అవ్వ‌బోతున్న‌ట్టు తెలిసింది.

మెగా హీరోలు అల్లు అర్జున్ - రామ్ చ‌ర‌ణ్ స‌ర‌స‌న న‌టించింది అమ‌లాపాల్‌. అప్ప‌ట్నుంచి ఆమెని మెగా హీరోయిన్ అంటున్నారు. ఆమె ద‌గ్గ‌రికి నాయ‌క్‌, ఇద్ద‌ర‌మ్మాయిల‌తో చిత్రాల త‌ర్వాత కూడా చాలా ఆఫ‌ర్లే వెళ్లాయి. కానీ దర్శ‌కుడు విజ‌య్‌ ని పెళ్లి చేసుకొని కొన్నాళ్ల‌పాటు సినిమాల‌కి దూర‌మైపోయింది. పెళ్లి త‌ర్వాత త‌మిళంలో న‌టిస్తోంది కానీ తెలుగులో మాత్రం చేయ‌లేదు. ఇక టాలీవుడ్‌ కి రాదేమో అన్న సందేహం వ్య‌క్త‌మైంది. కానీ విష్ణు ఒప్పించాడు. పెళ్లి త‌ర్వాత అమ‌లాపాల్ తెలుగులో ఒప్పుకొన్న తొట్ట తొలి చిత్రం విష్ణు `స‌ర‌దా`నే. మ‌రి ఇక నుంచి తెలుగులో కెరీర్ కంటిన్యూ చేస్తుందా లేదా అన్న‌ది చూడాలి. త్వ‌ర‌లోనే సూర్యతో క‌లిసి మేము అనే చిత్రంతో సంద‌డి చేయ‌బోతోంది.