వావ్.. బిగ్-బితో జాకీచాన్ సినిమా

90ల్లో వచ్చిన ఖాన్ త్రయాన్ని పక్కన పెట్టేస్తే అంతకుముందు వరకు ఇండియాస్ బిగ్గెస్ట్ స్టార్ ఎవరంటే అమితాబ్ బచ్చన్ పేరే చెబుతారు. ఆయన చూడని విజయాల్లేవు. ఆయన అందుకోని స్థాయి లేదు. ఖాన్ త్రయం జోరు మొదలయ్యాక ఆయన వెనుకబడిపోయారు కానీ.. అంతకుముందు ఇండియన్ సినిమాలో అమితాబ్ స్థానమే వేరు. ఐతే హీరోగా కెరీర్ ముగిసిపోయాక కూడా స్పెషల్ పాత్రలతో తన ప్రత్యేకతను చాటుకుంటూ వస్తున్నారాయన. ఇప్పటికీ ఇండియాలో అత్యంత డిమాండ్ ఉన్న నటుల్లో ఆయనొకరు. 70 ఏళ్లు పైబడ్డాక కూడా చాలా ఉత్సాహంగా సినిమాలు చేసుకుంటూ దూసుకెళ్తున్నారు బిగ్-బి. ఆయన త్వరలోనే ఇంటర్నేషనల్ సూపర్ స్టార్ జాకీ చాన్ తో స్క్రీన్ షేర్ చేసుకోబోతున్నట్లు వస్తున్న వార్తలు అభిమానులకు ఉత్సాహం కలిగిస్తున్నాయి.

అమితాబ్ ఒకప్పుడు నటించిన ‘ఆంఖే’ ఆయన కెరీర్లో ప్రత్యేకమైన సినిమాగా నిలిచింది. కొందరు అంధులు కలిసి ఒక బ్యాంకు దోపిడీకి పాల్పడే కథతో తెరకెక్కిన చిత్రమిది. పెద్ద హిట్టయింది. ఈ చిత్రానికి 16 ఏళ్ల తర్వాత సీక్వెల్ రాబోతోంది. అనీస్ బజ్మీ దర్శకత్వంలో త్వరలోనే ‘ఆంఖే-2’ మొదలు కానుంది. వచ్చే ఏడాది షూటింగ్ ఆరంభించి.. 2020లో ఈ చిత్రాన్ని రిలీజ్ చేస్తారట. ఈ చిత్ర కథ చైనాలోని కాసినో చుట్టూ తిరుగుతుందట. ఈ నేపథ్యంలో ఈ కథలో ఓ కీలక పాత్ర కోసం జాకీ చాన్ ను అడుగుతున్నారట. అమితాబ్ తో సినిమా అనేసరికి ఆయన కూడా సానుకూలంగానే స్పందించాడట. అంతా కలిసొచ్చి వీళ్లిద్దరూ కలిసి నటిస్తే ఆ సినిమాకు వచ్చే క్రేజే వేరుగా ఉంటుంది. అంతర్జాతీయ స్థాయిలో ఈ చిత్రం పెద్ద ఎత్తున రిలీజయ్యేందుకు ఆస్కారముంటుంది.