అమీకి దక్కింది సున్నానే!

2.0 సంచలనాలు వసూళ్లు కాసేపు పక్కన పెడితే ఇందులో ప్లస్సులు మైనస్సులు గురించి పెద్ద చర్చే జరుగుతోంది. ముఖ్యంగా ఫస్ట్ పార్ట్ లాగా ఇందులో ప్రత్యేకంగా హీరొయిన్ కాని తనతో రజనికి పాటలు కాని ఏమి లేకపోవడం అభిమానులను నిరాశ పరిచిన మాట వాస్తవం. కథకు అడ్డు వస్తాయి కాబట్టి అవేవి శంకర్ పెట్టలేదు అని సమర్ధించుకున్నా ఇవన్ని ఉండీ బ్రహ్మాండంగా ఆడిన శంకర్ సినిమాలు ఎన్నో ఉన్నాయి. ఇదలా ఉంచితే తనకేదో గొప్ప బ్రేక్ ఇస్తుందని ఆశించిన అమీ జాక్సన్ ఇందులో ఎలాంటి స్కోప్ లేని ఒక రోబో రోల్ దక్కడంతో నిరాశలో ఉందని చెన్నై మీడియా టాక్.

అందుకే ప్రమోషన్ కు దూరంగా ఉంటూ యూనిట్ పిలిచినా వేరే చోట ఉన్నానని చెప్పి స్కిప్ చేసిందనే న్యూస్ ప్రచారంలో ఉంది. నిజంగానే అమీ ట్రైలర్ లాంచ్ లో కాని హైదరాబాద్ లో జరిగిన ప్రెస్ మీట్ లో కాని కనిపించలేదు. అక్షయ్ కుమార్ అంతటి వాడే ముంబై నుంచి ప్రత్యేకంగా వచ్చి మరీ ప్రమోట్ చేసుకున్నాడు. కాని అమీ మాత్రం అడ్రెస్ లేదు. నిజానికి రోబో పాత్రే అయినా కనీసం రెండు మూడు పాటలు ఉంటాయని టాకీ పార్ట్ లో సైతం ఎక్కువ సన్నివేశాలు ఉంటాయని అమీ ఆశించిందట. అయితే అవేవి లేకపోవడంతో పాటు ప్లాస్టిక్ ఎక్స్ ప్రెషన్స్ ఇవ్వాల్సి రావడంతో అమీ పాత్ర పెద్దగా ఆకట్టుకోలేకపోయింది.

రోబోలో రజనిదే సోలో షో అయినప్పటికీ ఐశ్వర్య రాయ్ కు మంచి స్కోప్ ఇచ్చాడు శంకర్. ఫస్ట్ సీన్ నుంచి క్లైమాక్స్ వరకు ఐష్ కనిపిస్తూనే ఉంటుంది. అసలు సెకండ్ హాఫ్ మొత్తం ఐష్ మీద చిట్టి మనసు పారేసుకోవడం చుట్టే తిరుగుతుంది. అందుకే 2.0 ఆఫర్ వచ్చినప్పుడు అమీ కూడా అలాంటి ఊహలలోనే తెలుంటుంది. అయితే ఐలో విక్రంకు జోడిగా అంత మంచి పాత్ర ఇచ్చిన శంకర్ మరీ ఇలా చేస్తాడని అమీ అయినా ఊహించి ఉండదు కదా. బ్యాడ్ లక్ అంతే