హీరో సాయి తేజ్ పేరుతో డబ్బులు వసూలు చేస్తున్న అజ్ఞాత వ్యక్తి..!

మెగా హీరో సాయి తేజ్ పేరు వాడుకుని ఒక గుర్తు తెలియని వ్యక్తి తేజ్ డబ్బు అడగమన్నట్లుగా మెసేజులు చేస్తూ ఆయన గతంలో పనిచేసిన వ్యక్తుల నుంచి డబ్బులు వసూలు చేయాలని చూస్తున్నాడట. ఈ విషయాన్ని సాయి తేజ్ స్వయంగా తన సోషల్ మీడియా ఖాతా ద్వారా వెల్లడించారు. ఈ విషయం తన దృష్టికి వచ్చిన వెంటనే చట్టపరమైన చర్యలు తీసుకోవటానికి రెడీ అయ్యానని.. ఇక మీదట అజ్ఞాతవ్యక్తి పెట్టిన మెసేజ్ లకు స్పందించ వద్దని కోరుతూ సాయి తేజ్ ఓ ప్రకటనని సోషల్ మీడియాలో పోస్ట్ చేసాడు.

"ఒక వ్యక్తి నా పేరు చెప్పుకుని మోసం చేస్తున్నాడని.. నేను పని చేసిన వ్యక్తుల నుండి మరియు ఇతరుల నుండి ఆర్థిక సహాయం కోరుతున్నానని నా దృష్టికి వచ్చింది. నా సైడ్ నుండి దీనిపై చట్టపరమైన చర్యలు ప్రారంభించబడ్డాయి. దయచేసి పరిస్థితి గురించి తెలుసుకోండి. నా పేరుతో చేసే సంభాషణలకు దూరంగా ఉండండి'' అని సాయి తేజ్ ఈ నోట్ లో పేర్కొన్నారు. ఈ సందర్భంగా ఆ వ్యక్తి మరొక నటుడితో చేసిన వాట్సాప్ సంభాషణ యొక్క స్క్రీన్ షాట్‌ ను కూడా తేజ్ షేర్ చేశాడు. ఇందులో అతను తేజ్ పేరుతో 15 వేల రూపాయలు అడిగినట్లు తెలుస్తోంది.

అయితే సాయి తేజ్ తో పని చేసిన వారి నెంబర్లు అతనికి ఎలా తెలిసాయన్నది వెల్లడి కాలేదు. తెలిసిన వారే ఇలా చేశారా లేదా ఫోన్ హ్యాక్ చేసి మొబైల్ నెంబర్లు సేకరించాడా అని అందరూ డౌట్ పడుతున్నారు. ఏదేమైనా ఇటీవల సినీ ప్రముఖులపై సైబర్ నేరగాళ్లు ఎక్కువ దృష్టి పెట్టినట్లు తెలుస్తోంది. ఇప్పటికే అనేక పద్ధతుల్లో క్రైమ్స్ కి పాల్పడటం అలవాటు చేసుకున్న సైబర్ నేరగాళ్లు ఇప్పుడు ఇలాంటి పద్ధతిలో కూడా డబ్బులు దోచుకుంటున్నారు.