అన్నతో మూవీ చేస్తే అదే బ్యానర్ లో త‌మ్ముడి సినిమా ఓకే అవుతుందేమో..!

యంగ్ సెన్సేషనల్ విజయ్ దేవరకొండ తమ్ముడు ఆనంద్ దేవరకొండ కూడా హీరోగా ఇండస్ట్రీలో అడుగుపెట్టిన సంగతి తెలిసిందే. 'దొరసాని' అనే సినిమాతో ఎంట్రీ ఇచ్చినా అది ఆశించిన ఫలితాన్ని ఇవ్వలేదు. అయితే ఆ తర్వాత వచ్చిన దీంతో 'మిడిల్ క్లాస్ మెలోడీస్‌' ఆనంద్ కు మంచి పేరు తెచ్చిపెట్టింది. ఈ క్రమంలో హోమ్ బ్యానర్ లో దామోదర అనే కొత్త దర్శకుడిని ఇంట్రడ్యూస్ చేస్తూ 'పుష్పక విమానం' అనే సినిమాలో నటిస్తున్నాడు ఆనంద్. అలానే నిన్న తన పుట్టినరోజు సందర్భంగా మరో మూడు సినిమాలను ప్రకటించి దూకుడు చూపించాడు.

మధుర శ్రీధర్ రెడ్డి సమర్పణలో మధురా ఎంటర్టైన్మెంట్స్ - రోల్ కెమెరా విజువల్స్ సంస్థలు సంయుక్తంగా నిర్మిస్తున్న ఈ చిత్రంలో ఆనంద్ దేవరకొండ హీరోగా నటిస్తున్నాడు. అలానే హై లైఫ్ ఎంటర్టైన్మెంట్ బ్యానర్ లో కేదార్ సెలగం శెట్టి - వంశీ కారుమంచి కలిసి నిర్మించే సినిమా కూడా చేస్తున్నాడు. ఇదే క్రమంలో సురేష్ ప్రొడక్షన్స్ బ్యానర్ లో ఆనంద్ ఓ సినిమాకి కమిట్ అయ్యాడు. అయితే ఇప్పుడు ఆనంద్ తో సినిమాలు చేస్తున్న ప్రొడక్షన్ హౌసెస్ లో ఆల్రెడీ విజయ్ దేవరకొండ సినిమాలు కమిట్ అయ్యాడు.

ఇప్పటికే సురేష్ ప్రొడక్షన్స్ లో 'పెళ్లి చూపులు' సినిమా చేసిన విజయ్.. కేదార్ సెలగం శెట్టి నిర్మాణంలో ఓ ప్రాజెక్ట్ సైన్ చేసాడు. సుకుమార్ దర్శకత్వంలో విజ‌య్ హీరోగా నటించబోతున్న చిత్రానికి కేదార్ నిర్మాత‌గా వ్యవహరించనున్నాడు. ఇప్పుడు ఆయన ప్రొడక్షన్ లోనే ఆనంద్ దేవ‌ర‌కొండ త‌న త‌దుప‌రి సినిమాకి క‌మిటైయ్యాడు. మొత్తానికి అన్నతో ముందు సినిమా చేస్తే.. ఆ తర్వాత త‌మ్ముడికి కూడా అదే బ్యాన‌ర్ లో ఓ ప్రాజెక్ట్ కంఫర్మ్ అయినట్లేనని కామెంట్స్ వినిపిస్తున్నాయి. ఏదేమైనా వరుస సినిమాలను లైన్ లో పెట్టి దేవరకొండ బ్రదర్ బిజీ హీరోగా మారిపోయాడని చెప్పవచ్చు.