ప్రేమ‌దేశం లాంటిది ట్రై చేస్తావా కొండా!

విజ‌య్ దేవ‌ర‌కొండ సోద‌రుడు ఆనంద్ దేవ‌ర‌కొండ వ‌ర‌స సినిమాల‌తో కెరీర్ ప‌రంగా బిజీగా ఉన్న సంగ‌తి తెలిసిందే. ఇటీవ‌లే ఆనంద్ న‌టించిన పుష్ప‌క విమానం రిలీజై మిశ్ర‌మ స్పంద‌న‌లు అందుకుంది. ఆనంద్ న‌టుడిగా ప‌రిణ‌తి చెందుతున్నాడ‌ని పాజిటివ్ టాక్ వినిపించినా సినిమా ఆశించినంత పెద్ద విజ‌యాన్ని అందుకోలేక‌పోయింది. ఇక‌పోతే ఆనంద్ త‌దుప‌రి సినిమాల కోసం ఎంతో త‌ప‌న‌గా హార్డ్ వ‌ర్క్ చేస్తుండ‌డం త‌న సోద‌రుడి స‌ల‌హాలు తీసుకోవ‌డం ఆస‌క్తిక‌రం.

తాజాగా ఆనంద్ న‌టిస్తున్న‌ కొత్త‌ సినిమాకి కాస్టింగ్ కాల్ వెలువ‌డింది. యువ ప్రతిభావంతులైన నటీనటులకు అవకాశం కల్పించేందుకు ముందుకొచ్చింది `బేబి` టీమ్ అంటూ ప్ర‌క‌టించారు.  18 నుంచి 23 ఏళ్ల వయసున్న యువతీ యువకులు కాలేజ్ స్టూడెంట్స్ రోల్స్ కోసం కాస్టింగ్ కాల్ అనౌన్స్ చేసారు. స్టైలిష్ పోష్ లుక్ లో ఉండే కాలేజ్ స్టూడెంట్స్ క్యారెక్టర్స్ బేబి సినిమాలో కావాల్సిఉంది. ఆసక్తి ఉన్నవారు వారి ఫొటోలను పంపాల‌ని కోరారు.

ఆనంద్ దేవరకొండ-విరాజ్ అశ్విన్ -వైష్ణవి చైతన్య  నటిస్తున్న బేబి సినిమా దసరా పండుగ సందర్భంగా లాంఛనంగా ప్రారంభమైంది. ఈ చిత్రాన్ని మాస్ మూవీ మేకర్స్ సంస్థలో ఎస్ కేె ఎన్ నిర్మిస్తుండగా...సాయి రాజేష్ దర్శకత్వం వహిస్తున్నారు. పాప్ లుక్ రేంజు అంటే కాలేజ్ బ్యాక్ డ్రాప్ లో ల‌వ్ స్టోరీని ప్లాన్ చేశార‌నే అర్థ‌మ‌వుతోంది. ప్రేమ‌దేశం లాంటి కాలేజ్ ల‌వ్ స్టోరి చూసి.. గ‌ల్లీ బోయ్ లాంటి ఊపున్న పాప్- ర్యాప్ ప్రేమికుల‌ సినిమాని చూసి చాలా కాల‌మే అయ్యింది. అంత కిక్కు తెచ్చేది జూనియ‌ర్ కొండ‌ చేయాల‌నే ఆకాంక్షిద్దాం.