రంగ‌మ్మ‌త్త‌లా బ్లాస్ట్ అయ్యే పాత్ర‌లోనే ..!

ఎంపిక చేసుకున్న ప్ర‌తి పాత్రా ఒకే విధంగా ఉండ‌కూడ‌దు. అయితే న‌ట‌న‌లో వైవిధ్యం చూపిస్తూనే అద్భుతం అన్న కితాబు అందుకునే అవ‌కాశం ద‌క్కితే అది నిజంగా ఆర్టిస్టుకు ద‌క్కిన అదృష్టంగా భావించాలి. అన‌సూయ‌కు రంగ‌స్థ‌లం త‌ర్వాత పుష్ప‌లో అలాంటి అవకాశం ద‌క్కిందా? అంటే అవున‌నే ఇన్ సైడ్ గుస‌గుస వినిపిస్తోంది.

రంగ‌మ్మ‌త్త‌లా బ్లాస్ట్ అయ్యే అవ‌కాశ‌మే ద‌క్కింద‌ని అభిమానులు భావిస్తున్నారు. అల్లు అర్జున్ - సుకుమార్ హ్యాట్రిక్ చిత్రం పుష్ప ఇటీవ‌లే హైదరాబాద్ లో చిత్రీక‌ర‌ణ ప్రారంభ‌మైంది. అల్లు అర్జున్ ఇతర ప్రధాన తార‌ల‌పై కొన్ని కీలకమైన సన్నివేశాలను సుకుమార్ తెర‌కెక్కిస్తున్నారు.

తాజా స‌మాచారం మేర‌కు.. అనసూయ భరద్వాజ్ ఈ రోజు పుష్ప సెట్స్ లో చేరారు. త‌న ఇన్ స్టాలో షూటింగ్ లొకేషన్ నుంచి కొన్ని ఫోటోల‌ను పంచుకోగా వైర‌ల్ గా మారాయి. సుకుమార్ మునుపటి బ్లాక్ బస్టర్ రంగస్థలం లో చిరస్మరణీయమైన రంగమ్మత పాత్రను పోషించిన అనసూయ మరోసారి అత‌డి నిర్ధేశ‌నంలో న‌టించేందుకు ఎంతో ఉత్సుక‌త‌తో సిద్ధ‌మ‌య్యార‌ని ఈ ఫోటోలు చూస్తే అర్థ‌మ‌వుతోంది.

పుష్పలో మోలీవుడ్ స్టార్ ఫహద్ ఫాసిల్ విల‌న్ గా న‌టిస్తున్నారు. రష్మిక మండన్న క‌థానాయిక‌గా న‌టిస్తోంది. మైత్రి మూవీ మేకర్స్ - ముత్తంశెట్టి మీడియా సంయుక్తంగా ఈ చిత్రాన్ని నిర్మిస్తున్నాయి. దేవీశ్రీ సంగీతం అందిస్తున్నారు. పుష్ప పాట‌ల‌తో మ‌రోసారి ఆర్య సీన్ రిపీట్ చేస్తార‌నే అభిమానులు అంచనా వేస్తున్నారు.