రెండోసారైనా బ్రేక్ తెచ్చుకుంటావా పాపా?

జబర్దస్త్ కామెడీ షో ద్వారా పేరు ప్రఖ్యాతులు తెచ్చుకుని, ఇప్పుడు సినీ నటి అయిపోయింది అనసూయ. చాలా జాగ్రత్తగా కేరక్టర్లను ఎంచుకోవాలని డిసైడ్ అయ్యి, పవన్ కళ్యాణ్ పక్కన డ్యాన్సులు చేసే అవకాశాలను కూడా వదులుకుంది. చివరకు సోగ్గాడే చిన్ని నాయన మూవీతో టాలీవుడ్ తెరంగేట్రం చేసింది ఈ జబర్దస్త్ సుందరి. అయితే.. నాగ్ మరదలిగా అనసూయ నటించిన పాత్ర అంతగా క్లిక్ కాలేదు. సినిమా హిట్ అయినా, అనసూయకు మాత్రం మార్కులు పడలేదు.

లుక్స్ విషయంలో కానీ, గెటప్ లో కానీ, యాక్టింగ్ లో కానీ ప్రశంసలు రాలేదు. దీంతో ఇప్పుడీ భామ దృష్టి అంతా ఫుల్ ప్లెడ్జెడ్ కేరక్టర్ చేసిన క్షణం మూవీ పైనే ఉంది. క్షణంలో అనసూయ చేస్తున్న పాత్ర ఓ పవర్ ఫుల్ పోలీస్ ఆఫీసర్. ఓ నిజాయితీపరురాలైన కాప్ రోల్ లో ఈ భామ కనిపించనుంది. సోగ్గాడే సినిమా తరహాలో చిన్న పాత్ర కాదు, గ్లామర్ రోల్ అంతకంటే కాదు. ఇందులో అనసూయ కేరక్టర్ పూర్తి స్థాయిలో ఉండడమే కాదు.. యాక్షన్ సన్నివేశాలు కూడా చేయాల్సి ఉంటుంది. ఈ మూవీ చేసేందుకు కొంతమంది పోలీస్ ఆఫీసర్ల నడక - నడత చూసి, తెలుసుకుని ఫాలో అయిపోయింది అనసూయ.

పీవీపీ బ్యానర్ పై వస్తున్న ఈ మూవీపై అంచనాలు బాగానే ఉన్నాయి. డైరెక్టర్ రవికాంత్ ఈ సినిమాని థ్రిల్లర్ గా తెరకెక్కించాడు. అడివి శేష్, ఆదా శర్మలు లీడ్ రోల్స్ లో నటిస్తున్న ఈ మూవీ ద్వారా అయినా.. తనకు టాలీవుడ్ లో బ్రేక్ వస్తుందని అనసూయ ఆశలు పెట్టుకుంది అనసూయ. ఓ మర్డర్ మిస్టరీని సాల్వ్ చేయడమే ఈ స్టోరీ. ఈ కాన్సెప్ట్ క్లిక్ అయితే.. అనసూయ కూడా క్లిక్ అయినట్లే.