సునీల్ కు జోడీగా నెగెటివ్ షేడ్స్ ఉన్న పాత్రలో అనసూయ..?

యాంకర్ గా బుల్లితెరపై హవా కొనసాగిస్తున్న అందాల అనసూయ.. అవకాశం వచ్చినప్పుడల్లా వెండితెరపై కూడా సత్తా చాటుతోంది. 'క్షణం' 'కథనం' 'ఎఫ్ 2' 'సోగ్గాడే చిన్నినాయనా' 'మీకుమాత్రమే చెప్తా' వంటి చిత్రాలలో ప్రేక్షకులను అలరించింది. ఇక సుకుమార్‌ దర్శకత్వంలో తెరకెక్కిన ‘రంగస్థలం’ సినిమాలో ఆమె పోషించిన రంగమ్మత్త పాత్ర మంచి తెచ్చిపెట్టడమే కాకుండా నటిగా బిజీ అయ్యేలా చేసింది. అప్పటి నుంచి ఇంపార్టెంట్ రోల్స్ లో మాత్రమే నటిస్తున్న అనసూయ.. ఇప్పుడు అల్లు అర్జున్ హీరోగా సుకుమార్ దర్శకత్వంలో వస్తున్న 'పుష్ప' సినిమాలో కీలక పాత్రలో నటిస్తోంది.

‘పుష్ప’ షూటింగ్ లో ఇటీవలే జాయిన్ అయినట్లు అనసూయ వెల్లడించింది. ఇందులో ఆమె సునీల్ కు జోడీగా కనిపించనుందని సమాచారం. అంతేకాకుండా కాస్త నెగిటివ్ షేడ్స్ ఉన్న పవర్ ఫుల్ రోల్ లో అనసూయ కనిపించనుందట. అలానే ఇందులో ఆమె చిత్తూరు యాసలో మాట్లాడనుందట. రంగమ్మత్త పాత్ర తరహాలోనే ప్రాధాన్యత ఉండేలా సుక్కూ ఈ పాత్రను డిజైన్ చేశారట. ప్రస్తుతం సునీల్ - అనసూయ పాల్గొనే సన్నివేశాల చిత్రీకరణ జరుగుతున్నట్లు తెలుస్తోంది.

కాగా, ఇటీవల 'చావు కబురు చల్లగా' సినిమాలో పైన పటారం అంటూ మాస్ మసాలా సాంగ్ చేసి అందరినీ ఆశ్చర్యపరిచిన అనసూయ.. ప్రస్తుతం ‘ఖిలాడి’ ‘రంగమార్తాండ’ 'ది చేజ్' 'థాంక్ యు బ్రదర్' వంటి సినిమాలలో నటిస్తోంది. ఈ క్రమంలో ఆమె చేస్తున్న పాన్ ఇండియా మూవీ 'పుష్ప' ఎలాంటి గుర్తింపు తెచ్చిపెడుతుందో చూడాలి.