పవన్ ఫ్యాన్స్ ఏ రేంజిలో ఏడిపించారంటే..

మెగా ఫ్యామిలీ హీరోల సినిమాలకు సంబంధించి ఏ వేడుక జరిగినా పవర్ స్టార్ నినాదాలతో హోరెత్తిపోవడం మామూలే. ఈ విషయంలో నాగబాబు ఓసారి తీవ్ర స్థాయిలో మండిపడ్డా.. అల్లు అర్జున్ కూడా ఈ విషయంలో ఘాటుగా స్పందించినా పవన్ అభిమానుల్లో మార్పు రాలేదు. ఐతే తాజాగా మెగా ఫ్యామిలీ హీరోలకు సంబంధం లేని వేడుకలోనూ పవన్ అభిమానుల గోల శ్రుతి మించింది. విజయవాడలో జరిగిన ‘వంగవీటి’ ఆడియో వేడుకలో చోటు చేసుకున్న చిత్రమిది. ఈ వేడుకకు పవన్ అభిమానులు కూడా హాజరయ్యారు. పవర్ స్టార్ నినాదాలతో హోరెత్తించారు. ఓ దశలో వేదిక వైపు దూసుకొచ్చే ప్రయత్నం చేశారు.

యాంకర్ ఝాన్సీ అభిమానులకు ఎన్నిసార్లు విజ్నప్తి చేసినా ఫలితం లేకపోయింది. వేడుకలో తీవ్ర గందరగోళ పరిస్థితులు నెలకొంది. ఓ దశలో ఫంక్షన్ కొనసాగించలేని పరిస్థితి కూడా తలెత్తింది. దీంతో ఝాన్సీ సహనం కోల్పోయింది. పవన్ కళ్యాణ్ క్రమశిక్షణకు మారు పేరని.. అలాంటి హీరోకు మీరిచ్చే గౌరవం ఇదేనా అని ప్రశ్నించింది. సినిమాలంటే విజయవాడ జనాలకు ఎంత పిచ్చో చూపించాలని.. కానీ అది ఈ తరహాలో కాదని ఝాన్సీ అంది. ఇలాంటి నినాదాలతో ఈ వేడుకకు వచ్చి అతిథుల్ని ఇబ్బందులకు గురి చేయడం సరి కాదని ఝాన్సీ పేర్కొంది. ఈ వేడుక కోసం ఎంతో కష్టపడి విజయవాడ వరకు వచ్చిన అతిథులకు ఇలాంటి పరిస్థితి తలెత్తడం దురదృష్టకరమని ఝాన్సీ అభిప్రాయపడింది. అయినప్పటికీ పవన్ అభిమానులు శాంతించలేదు. మరోవైపు సోషల్ మీడియాలో ఝాన్సీకి వ్యతిరేకంగా పవన్ ఫ్యాన్స్ ట్రోలింగ్ మొదలుపెట్టారు.



Like Us on Facebook : https://www.facebook.com/Tupakidotcom/