వెండితెర మీదకు యాంకర్ సుమ.. ఆసక్తికరంగా ప్రీ లుక్ పోస్టర్..!

బుల్లితెరపై తిరుగులేని వ్యాఖ్యాతగా రాణిస్తున్న యాంకర్ సుమ కనకాల గురించి తెలుగు ప్రేక్షకులకు ప్రత్యేకంగా పరిచయం చేయాల్సిన అవసరం లేదు. మోడ్రన్ యాంకర్లకు పోటీగా నిలుస్తూ అత్యంత బిజీయెస్ట్ యాంకర్ గా కొనసాగుతోంది. 1996లో 'కళ్యాణ ప్రాప్తిరస్తు' చిత్రంతో వెండితెరకి పరిచయమైన సుమ.. పలు మలయాళ, తెలుగు చిత్రాలో నటించింది. ఈ క్రమంలో యాంకరింగ్ వైపు అడుగులు వేసి సక్సెస్ అయింది. మధ్యలో 'వర్షం' 'ఢీ' 'బాద్ షా' 'ఓ బేబీ' వంటి చిత్రాల్లో తళుక్కున మెరిసింది. 'విన్నర్' సినిమాలో ఓ సాంగ్ కూడా పాడి అలరించింది. అయితే ఇప్పుడు చాలా గ్యాప్ తర్వాత పూర్తి స్థాయి నటిగా మేకప్ వేసుకుంటోంది సుమ.

నటిగా గ్రాండ్ ఎంట్రీ ఇవ్వనున్నట్లు ఇటీవల ఓ వీడియో ద్వారా వెల్లడించారు. ప్రస్తుతం ఓ సినిమా చేస్తున్నానని త్వరలోనే దీనికి సంబంధించిన విషయాలు వెల్లడి కానున్నాయని తెలిపారు. దీపావళి పర్వదినాన్ని పురస్కరించుకుని సుమ నటిస్తున్న సినిమాని మేకర్స్ అధికారికంగా ప్రకటించారు. ఈ సందర్భంగా ఓ ఆసక్తికరమైన ప్రీ లుక్ పోస్టర్ ను విడుదల చేశారు. ఇందులో యాంకర్ సుమ ఓ రోలు మీదున్న రోకలిని అందుకోడానికి ప్రయత్నిస్తోంది. ఆమె చేతి మీద వెంకన్న అనే పచ్చబొట్టును గమనించవచ్చు.

వెన్నెల క్రియేషన్స్ పతాకంపై ప్రొడక్షన్ నెంబర్ 2గా ఈ సినిమా రూపొందుతున్నట్టు మేకర్స్ వెల్లడించారు. బలగ ప్రకాష్ దర్శకత్వం వహిస్తున్న ఈ చిత్రాన్ని విజయ్ కలివరపు - అనుష్ కుమార్ నిర్మిస్తున్నారు. స్టార్ మ్యూజిక్ డైరెక్టర్ ఎంఎం కీరవాణి ఈ చిత్రానికి సంగీతం సమకూర్చానున్నారు.

సుమ ప్రధాన పాత్ర పోషిస్తున్న ఈ సినిమాకు సంబంధించిన టైటిల్ మరియు ఫస్ట్ లుక్ పోస్టర్ ను నవంబర్ 6న విడుదల చేయనున్నట్లు చిత్ర బృందం ప్రకటించింది. స్టార్ యాంకర్ గా దాదాపు రెండు దశాబ్దాలపాటు బుల్లితెరని ఏలిన సుమ.. ఇప్పుడు సిల్వర్ స్క్రీన్ మీద తన భర్త రాజీవ్ కనకాల కు పోటీగా మారుతుందేమో చూడాలి.