ఘనంగా ప్రారంభమైన ‘అందరూ బాగుండాలి.. అందులో నేనుండాలి’

కమెడియన్ అలీ, సీనియర్ నరేష్ ప్రధాన పాత్రల్లో.. అలీ సొంత బ్యానర్ ‘అలీవుడ్ ఎంట‌ర్ టైన్మెంట్స్’ పతాకంపై తెరకెక్కుతున్నచిత్రం ‘అందరూ బాగుండాలి.. అందులో నేనుండాలి.’ ఈ బ్యానర్ లో ఇదే తొలి సినిమా కావడం విశేషం. శ్రీపురం కిర‌ణ్ ద‌ర్శ‌క‌త్వంలో తెర‌కెక్కుతోన్న ఈ మూవీ హైద‌రాబాద్ అన్న‌పూర్ణ స్టూడియోస్‌లో బుధవారం లాంఛనంగా ప్రారంభమైంది. ముహూర్త‌పు స‌న్నివేశానికి ప్ర‌ముఖ ద‌ర్శ‌కుడు ఎస్వీకృష్ణా రెడ్డి, నిర్మాత అచ్చిరెడ్డి క్లాప్‌నివ్వ‌గా.. ఎస్. గోపాల్ రెడ్డి కెమెరా స్విచ్ ఆన్ చేశారు. తొలి స‌న్నివేశానికి ద‌ర్శ‌కులు బోయపాటి శ్రీను, బాబీ గౌరవ దర్శకత్వం వహించారు. ఈ కార్య‌క్ర‌మానికి ముఖ్య అతిథిగా సినిమాటోగ్ర‌ఫీ శాఖ మంత్రి తలసాని శ్రీనివాస్ యాదవ్ హాజ‌ర‌య్యారు. జీవిత రాజ‌శేఖ‌ర్, త‌నికెళ్ల భ‌ర‌ణి, హేమ‌ తదితరులు పాల్గొన్నారు. అతిథులు మాట్లాడుతూ ఈ చిత్రం ఘన విజయం సాధించాలని ఆకాంక్షించారు.

మాది ప్ర‌త్యేక‌ అనుబంధం : మంత్రి త‌ల‌సాని
అలీతో నాకు ప్రత్యేక అనుబంధం ఉంది. ఆయ‌న నిర్మాణంలో రూపొందుతోన్న ‘అందరూ బాగుండాలి.. అందులో నేనుండాలి’ చిత్ర ప్రారంభోత్సవానికి రావడం సంతోషంగా ఉంది. మంచి కాన్సెప్ట్ ఉన్న ఈ సినిమాలో అలీ, నరేష్ కలిసి నటిస్తుండడం ఆనందంగా ఉంది. భవిష్యత్తులో వీరు మరిన్ని మంచి సినిమాల్లో నటించాలని కోరుకుంటున్నాను.

యథార్థ ఘటనల ఆధారంగా.. : అలీ
దర్శకుడు కిరణ్ నేను చెన్నై లో రూమ్ మేట్స్. మలయాళంలో జరిగిన ఒక వాస్తవ సంఘటన ఆధారంగా ఈ సినిమా తీస్తున్నాము. మల‌యాళం బ్లాక్ బ‌స్ట‌ర్ ‘వికృతి’ సినిమాకు ఇది రీమేక్. ఈ కథ నచ్చి వెంటనే సినిమా చూడాలని నరేష్ గారికి చెప్పాను. ఆయన కూడా ఇంప్రెస్ అవడంతో ఈ సినిమా చేస్తున్నాను అన్నారు. పవిత్ర లోకేష్, సాయి కుమార్ బ్రదర్ రవిశంకర్ ఈ సినిమాలో ఒక పాత్రలు చేస్తున్నారు.

అలీ బ్రాండ్ అంబాసిడర్ : నరేష్
అలీ సినిమా చేస్తున్నాడంటే సినిమాకు ఒక బ్రాండ్ వస్తుంది. మేమిద్దరం కలసి ఎన్నో అద్భుతమైన చిత్రాల్లో నటించాము. ‘అందరూ బాగుండాలి అందులో నేనుండాలి’ మంచి కాన్సెప్ట్ తో వస్తోన్న సినిమా. అలీ ఈ సినిమాను నిర్మిస్తూ నటిస్తున్నాడు. దర్శకుడు శ్రీపురం కిరణ్ మంచి మార్పులు చేసి బెస్ట్ స్క్రిప్ట్ ను రెడీ చేసుకున్నాడు. ఒక మంచి సినిమాలో భాగమైనందుకు సంతోషంగా ఉంది.

మా సినిమా అలరిస్తుంది : శ్రీపురం కిర‌ణ్, దర్శకుడు
అలీ గారు స్థాపించిన ‘అలీవుడ్ బ్యానర్’ లో నేను డైరెక్ట్ చెయ్యడం సంతోషంగా ఉంది. నరేష్ గారు మా సినిమా చెయ్యడానికి ఒప్పుకోవడంతో సినిమాకు మరింత క్రేజ్ వచ్చింది. ఈరోజు నుండి షూటింగ్ స్టార్ట్ చేస్తున్నాం. ఈ సినిమా ప్రేక్షకుల్ని తప్పకుండా అలరిస్తుంది.

ఆనందంగా ఉంది : మౌర్యానీ, హీరోయిన్
అలీగారంటే అంద‌రికీ అభిమాన‌మే. న‌రేశ్ గారితో క‌లిసి న‌టిస్తుండ‌టం చాలా ఆనందంగా ఉంది. చాలా మంది ప్ర‌తిభావంత‌మైన‌, ఎక్స్ పీరియ‌న్స్ ఉన్న ఆర్టిస్టులు, టెక్నీషియ‌న్ల‌తో క‌లిసి ప‌ని చేసే అవ‌కాశం రావ‌డం నా అదృష్టం.