ట్రైలర్ టాక్: అంధగాడి అల్లరే అల్లరి

హీరో అంధుడు అనగానే విషాదభరితమైన సినిమాలే గుర్తుకొస్తాయి. ఆ సినిమాలన్నీ ఒక తరహాలో సాగుతాయి. ఐతే హీరో అంధుడైనా బోలెడంత వినోదం పండించవచ్చని రుజువు చేసే ప్రయత్నంలో ఉన్నట్లున్నాడు కొత్త దర్శకుడు వెలిగొండ శ్రీనివాస్. టాలీవుడ్లో చాలా సినిమాలకు రచయితగా పని చేసి.. ‘అంధగాడు’తో దర్శకుడిగా మారిన వెలిగొండ శ్రీనివాస్.. ట్రైలర్ తో బాగానే ఇంప్రెస్ చేశాడు.

ఈ ట్రైలర్ ఆసాంతం ఎంటర్టైనింగ్ గా సాగుతూ.. సినిమా మీద మంచి అంచనాలు పెంచేలా ఉంది. హీరో అంధుడైనప్పటికీ అతడి అల్లరి వేషాలకేమీ కొదవలేదు. అయ్యో పాపం అని రోడ్డు దాటించిన అమ్మాయిని మీకు బాయ్ ఫ్రెండ్ లేడు కదండీ అనే రకం అతను. ఆ అమ్మాయి ఛీకొట్టి పోతే.. ఆమె ప్రపోజ్ చేస్తే రిజెక్ట్ చేశా అని ఫ్రెండుకు చెప్పుకుంటాడు. రాజ్ తరుణ్ తో పాటు సత్య.. సుదర్శన్ కూడా సినిమాలో బాగానే ఎంటర్టైన్ చేశారు ట్రైలర్లో.

సగం వరకు ఎంటర్టైనింగ్ గా సాగుతూ.. ఆ తర్వాత సీరియస్ టర్న్ తీసుకునేలా ఉంది ‘అంధగాడు’. ఐతే హీరోయిన్ హెబ్బా పటేల్ గ్లామర్ కొంచెం దెబ్బ తిన్నట్లుగా ఉంది ట్రైలర్లో చూస్తే. రాజా రవీంద్ర నెగెటివ్ రోల్ లో కనిపిస్తున్నాడు. ఏకే ఎంటర్టైన్మెంట్స్ బేనర్లో ఈడోరకం ఆడోరకం.. కిట్టు ఉన్నాడు జాగ్రత్త తర్వాత రాజ్ తరుణ్ చేసిన మూడో సినిమా ఇది. జూన్ 2న ‘అంధగాడు’ విడుదల కానుంది.