కొబ్బరికాయ కొట్టే రోజే ఫుల్ క్లారిటీతో రావిపూడి!

సూపర్ స్టార్ మహేష్ బాబు తాజా చిత్రం 'సరిలేరు నీకెవ్వరు'ను మహేష్ నాన్నగారు ఎవర్ గ్రీన్ సూపర్ స్టార్ కృష్ణ జన్మదినం సందర్భంగా ఈ రోజు లాంచ్ చేసిన సంగతి తెలిసిందే. ఈ సినిమాకు ఈరోజు ఉదయం పూజా కార్యక్రమాలు జరిగాయి. సీనియర్ దర్శకులు కె. రాఘవేంద్ర రావుగారు క్లాప్ కొట్టారు. శ్యాం ప్రసాద్ రెడ్డిగారు కెమెరా స్విచ్ ఆన్ చేయగా అనిల్ రావిపూడి మొదటి షాట్ కు దర్శకత్వం వహించాడు.

మహేష్ గత చిత్రం 'మహర్షి'కి భిన్నంగా ఈ సినిమా విషయంలో మేకర్స్ ప్రమోషన్ విషయంలో మొదటి రోజునుంచే జోరు చూపిస్తున్నారు. ఈ రోజు సినిమా లాంచ్ చేస్తారని అందరికీ తెలుసు కానీ ఈ సినిమా టైటిల్ ను వెల్లడిస్తారని.. టైటిల్ లోగో పోస్టర్ రిలీజ్ చేస్తారని ఎవరూ ఊహించలేదు. ఇది మహేష్ అభిమానులకు ఒక స్వీట్ సర్ ప్రైజ్. సాధారణంగా మహేష్ సినిమాలకు టైటిల్ విషయంలో ఎన్నో ఊహాగానాలు సాగుతుంటాయి. ఈ సినిమాకు అనిల్ రావిపుడి అలాంటి అవకాశమే ఇవ్వలేదు.

మరో విషయం ఏంటంటే లాంచ్ సందర్భంగా మాట్లాడిన సమయంలో ఈ అవకాశం ఇచ్చినందుకు మహేష్ కు కృతజ్ఞతలు తెలుపుతూ ఖచ్చితంగా ఒక మంచి హిట్ ఫిలిం ఇచ్చి ఆయన ఋణం తీర్చుకోవాలని కోరుకుంటున్నాను అంటూ కాన్ఫిడెంట్ గా చెప్పాడు. ఇక దిల్ రాజు గారు చెప్పినట్టు ఈ సినిమా 20-20 ఆడాలని కోరుకుంటున్నానని.. మహేష్ నుంచి ప్రేక్షకులు ఆశించే అన్ని ఎలిమెంట్స్ ఈ సినిమాలో ఉంటాయని చెప్పాడు. లేడీ సూపర్ స్టార్ విజయశాంతి కృష్ణగారి సినిమా ద్వారా హీరోయిన్ గా పరిచయం అయ్యారని.. ఇపుడు 13 ఏళ్ళ గ్యాప్ తర్వాత ఆయన కుమారుడు మహేష్ సినిమా ద్వారా మళ్ళీ రీ ఎంట్రీ ఇస్తున్నారని విజయశాంతి ప్రెస్ నోట్ ను చదివి వినిపించాడు.

ఇక ఈ సినిమా రిలీజ్ ను ఇప్పుడే ప్రకటించడం కూడా అనిల్ రావిపూడి దూకుడును చూపిస్తోంది. 2020 సంక్రాంతి రిలీజ్ అంటూ ముందే సంక్రాంతి స్లాట్ బుక్ చేసుకున్నారు. ఓవరాల్ గా 'మహర్షి' ప్రమోషన్ అప్రోచ్ కు భిన్నంగా 'సరిలేరు నీకెవ్వరు' సాగుతోందని మాత్రం చెప్పగలం.