సుమను తికమక పెట్టేసిన అనిల్ రావిపూడి!

టాలీవుడ్లో ఇప్పుడున్న స్టార్ డైరెక్టర్స్ లో కామెడీపై మంచి పట్టున్న దర్శకుడిగా అనిల్ రావిపూడి కనిపిస్తాడు. మహేశ్ బాబుతో ఆయన చేసిన 'సరిలేరు నీకెవ్వరు' సినిమా సంచలన విజయాన్ని నమోదు చేసింది. మహేశ్ కెరియర్లోనే అత్యధిక వసూళ్లను రాబట్టిన సినిమాగా నిలిచింది. ఆ సినిమా వలన ఏర్పడిన సాన్నిహిత్యం కారణంగా అనిల్ రావిపూడి కూడా 'సర్కారువారి పాట' సినిమా ప్రీ రిలీజ్ ఈవెంట్ కి వచ్చాడు.

సాధారణంగా స్టేజ్ పైకి వచ్చిన వారిని సుమ తన ప్రశ్నలతో తికమక పెట్టేస్తుంది. అలాంటిది అందుకు భిన్నంగా ఈ ఈవెంటులో తాను అడిగిన 3 ప్రశ్నలకు సమాధానం చెప్పాలంటూ సుమను తికమక పెట్టడానికి అనిల్ రావిపూడి ప్రయత్నించాడు. మొన్న ' సర్కారువారి పాట' సినిమా నుంచి 'పెన్నీ సాంగ్ వదిలారు కదా. అందులో మహేశ్ డాన్స్ బాగా నచ్చిందా? సితార డాన్స్ బాగా నచ్చిందా? అలాగే సూపర్ స్టార్ అనే ట్యాగ్ కృష్ణగారికి బాగుంటుందా? మహేశ్ బాబుగారికి బాగుంటుందా? ఈ సినిమా నిర్మాణ సంస్థలైన మైత్రీ - 14 రీల్స్ లో మీకు ఏదంటే ఇష్టం? అంటూ అడిగారు.

'ఈ ప్రశ్నలకు సమాధానం చెప్పడం నా వల్ల కాదు .. మీరు ఏం కావాలంటే అది రాసుకోండి .. ఏం కావాలంటే అది చేసుకోండి. నేను ఇంకో ఈవెంట్ చేసుకోవాలా వద్దా?' అని సుమ అనడంతో, మహేశ్ తో పాటు అంతా నవ్వేశారు. 'మీరు యాంకరింగ్ మాత్రం నేర్చుకోకండి సార్' అని చెప్పేసి అనిల్ తో సుమ అనడం అక్కడ నవ్వులు పూయించింది. ఇక ఈ సినిమా గురించి ఆయన మాట్లాడుతూ .. "ఈ సినిమాకి ముందు పరశురామ్ ఎంత స్ట్రగుల్ అయ్యారనేది నాకు తెలుసు. ఈ సినిమా పెద్ద హిట్ కొట్టాలని నేను కోరుకుంటున్నాను. డైలాగ్స్ .. సాంగ్స్ అన్నీ సూపర్బ్ గా ఉన్నాయి.

ఈ రోజుల్లో ఒక సినిమా సక్సెస్ అనేది మ్యూజిక్ తోనే సగం తెలిసిపోతోంది. తమన్ ఇచ్చిన పాటలతో ఈ సినిమా బ్లాక్ బస్టర్ హిట్ అనే విషయం తెలిసిపోతోంది. అందుకు నేను తమన్ గారికి కంగ్రాట్స్ చెబుతున్నాను. ఈ పాండమిక్ లో నిర్మాతలు ఎంతో కష్టపడి ఈ సినిమాను నిర్మించారు. వాళ్లకి వడ్డీతో సహా డబ్బులు వచ్చేయాలని కోరుకుంటున్నాను. మహేశ్ గారితో పనిచేసే ప్రతి డైరెక్టర్ కి ఒక కిక్ ఉంటుంది. ఆయనతో మళ్లీ ఎప్పుడెప్పుడు పని చేద్దమా అనే వైబ్ క్రియేట్ అవుతూ ఉంటుంది. 'సరిలేరు నీకెవ్వరు'కి మించిన హిట్ ను ఈ సినిమా సాధించాలని కోరుకుంటున్నాను" అంటూ ముగించారు.