'ఎఫ్-3'లో మెగాహీరో హైలైట్ కాబోతున్నాడా..??

టాలీవుడ్ ఇండస్ట్రీలో వరుస విజయాలతో దూసుకుపోతున్నాడు డైరెక్టర్ అనిల్ రావిపూడి. 2015లో పటాస్ సినిమాతో దర్శకుడిగా మారిన అనిల్.. గతేడాది సరిలేరు నీకెవ్వరూ వరకు హిట్స్ ఖాతాలో వేసుకున్నాడు. పటాస్, సుప్రీం, రాజా ది గ్రేట్, ఎఫ్2, సరిలేరు నీకెవ్వరూ సినిమాలతో స్టార్ డైరెక్టర్ స్టేటస్ దక్కించుకున్నాడు. ఒకవైపు మాస్.. మరోవైపు క్లాస్ కంటెంట్ తో ప్రేక్షకులను అలరిస్తున్నాడు అనిల్. మొత్తానికి ఫ్యామిలీ ప్రేక్షకులను దృష్టిలో పెట్టుకొని సినిమాలు చేస్తున్నాడు. ప్రతి సినిమాలో కామెడీ ప్రధానంగా తెరకెక్కిస్తున్న అనిల్.. ప్రస్తుతం ఎఫ్2 సీక్వెల్ ఎఫ్3 మూవీ రూపొందిస్తున్నాడు.

2019లో విక్టరీ వెంకటేష్, వరుణ్ తేజ్ లను హీరోలుగా తమన్నా, మెహరీన్ లను హీరోయిన్లుగా తెరకెక్కించిన చిత్రం 'ఎఫ్2'. ఫన్ అండ్ ఫ్రస్ట్రేషన్ అంటూ సంక్రాంతిబరిలో విడుదలైన ఈ సినిమా మంచి విజయాన్ని అందుకొని పైసావసూల్ చేసింది. ఫుల్ లెన్త్ కామెడీ ఎంటర్టైనర్ గా తెరకెక్కిన ఆ సినిమాకు సీక్వెల్ ఎఫ్3. ప్రస్తుతం షూటింగ్ దశలో ఉన్నటువంటి ఈ మూవీ ప్రేక్షకులలో భారీ అంచనాలను క్రియేట్ చేసింది. దిల్ రాజు ఈసారి బడ్జెట్ విషయంలో రాజీపడకుండా సినిమాను నిర్మిస్తున్నాడని టాక్.

అయితే ఎఫ్3 అంటే ఫన్ అండ్ ఫ్రస్ట్రేషన్ తో పాటు ఈసారి ఫ్యామిలీ ఎమోషన్ యాడ్ చేశారు మేకర్స్. అయితే మొదటి పార్టులో వెంకటేష్ పాత్రతో ఎక్కువగా కామెడీ క్రియేట్ చేసిన అనిల్.. ఈసారి వరుణ్ తేజ్ తో ఎక్కువ కామెడీ ప్లాన్ చేసినట్లు సమాచారం. అందుకు తగ్గట్టుగానే ఎఫ్3లో వరుణ్ క్యారెక్టర్ డిజైన్ చేసాడట అనిల్. చూడాలి మరి ఈసారి తన మార్క్ కామెడీ చూపిస్తాడేమో. ఈ ఏడాది ఆగష్టు 27న ఎఫ్3 సినిమాను విడుదల చేస్తున్నట్టు అధికారికంగా ప్రకటించారు మేకర్స్. ప్రస్తుతం కరోనా విలయతాండవం చేస్తుండటంతో షూటింగ్ నిలిచిపోయింది. కాబట్టి సినిమా విడుదల విషయంలో మాత్రం మరోసారి మార్పు జరిగే అవకాశం ఉన్నట్లు ఇండస్ట్రీ టాక్.