ఆ కథకు అదే బెస్ట్ క్లైమాక్స్: అనిల్ రావిపూడి

సూపర్ స్టార్ మహేష్ బాబు తాజా చిత్రం 'సరిలేరు నీకెవ్వరు' సంక్రాంతి సందర్భంగా విదుదలైంది. సినిమాకు మిక్స్డ్ టాక్ వచ్చింది కానీ బాక్స్ ఆఫీస్ దగ్గర వసూళ్లు మాత్రం భారీగా ఉన్నాయి. సంక్రాంతి పండగ ఎఫెక్ట్ తో థియేటర్లలో హౌస్ ఫుల్స్ పడుతున్నాయి. అయితే ఈ సినిమా గురించి దర్శకుడు ప్రమోషన్స్ లో అనిల్ రావిపూడి గొప్పగా చెప్పిన కొన్ని అంశాలు స్క్రీన్ పై అంతగా వర్క్ ఔట్ కాలేదు. ఉదాహరణకు.. ట్రైన్ ఎపిసోడ్ ఎఫెక్టివ్ గా లేదు.

అంతే కాదు ఈ సినిమాలో క్లైమాక్స్ పై కూడా చాలామంది పెదవి విరిచారు. మాస్ ఎంటర్టైనర్ గా తెరకెక్కిన ఈ సినిమాకు సాఫ్ట్ ఎండింగ్ సరిపోలేదనే అభిప్రాయాలు వ్యక్తం అవుతున్నాయి. ఈ విషయంపై దర్శకుడు అనిల్ రావిపూడి స్పందించారు. క్లైమాక్స్ కు మిశ్రమ స్పందన వచ్చిన సంగతి తనకు తెలుసని.. అయితే ఆ రెస్పాన్స్ ఇండస్ట్రీ వ్యక్తుల నుంచి వచ్చిందని సాధారణ ప్రేక్షకులకు మాత్రం నచ్చిందని అన్నారు. నిజానికి ఆ క్లైమాక్స్ ను రాసే సమయంలోనే ఇలాంటి మిశ్రమ స్పందన వస్తుందని ఊహించానని తెలిపారు.

అయితే ఈ కథకు అదే బెస్ట్ క్లైమాక్స్ అని అనిల్ రావిపూడి చెప్పుకొచ్చారు. క్లైమాక్స్ భిన్నంగా ఉన్నప్పటికీ మహేష్ బాబు ఈ విషయంలో తన జడ్జిమెంట్ ను సపోర్ట్ చేశారని కూడా చెప్పారు. విమర్శలు ఎలా ఉన్నప్పటికీ అనిల్ రావిపూడి మాత్రం తన క్లైమాక్స్ కరక్టే అంటున్నారు.