అఖిల్ 5 కోసం ఆ డైరెక్టర్ ను సెట్ చేస్తున్నారా?

అఖిల్ అక్కినేని ఇప్పటివరకూ మూడు సినిమాలలో నటిస్తే ఒక్కటి కూడా అఖిల్ కు సాలిడ్ హిట్ అందించలేకపోయింది. త్వరలో అఖిల్ 'మోస్ట్ ఎలిజిబుల్ బ్యాచ్ లర్' సినిమాతో ప్రేక్షకులను మెప్పించేందుకు రెడీ అవుతున్నాడు. జీఎ2 పిక్చర్స్.. యూవీ క్రియేషన్స్ బ్యానర్లు సంయుక్తంగా ఈ సినిమాను నిర్మిస్తుండగా బొమ్మరిల్లు భాస్కర్ దర్శకత్వం వహిస్తున్నాడు. ఇక ఈ సినిమా విడుదలకు ముందే అఖిల్ కు మరో క్రేజీ ప్రాజెక్ట్ సెట్ చేసేందుకు అక్కినేని నాగార్జున రెడీ అవుతున్నారట.

కమర్షియల్ సినిమాలను రూపొందించడంలో స్పెషలిస్టు అయిన అనిల్ రావిపూడి ఈమధ్యే మహేష్ బాబుతో 'సరిలేరు నీకెవ్వరు' సినిమాకు దర్శకత్వం వహించారు. ఈ సినిమా కలెక్షన్స్ అటు మహేష్ బాబు కెరీర్లోనూ.. అనిల్ రావిపూడి కెరీర్లోనూ హయ్యెస్ట్ గా నిలవడం విశేషం. స్టార్ హీరోలందరూ తమ ప్రాజెక్టులతో బిజీగా ఉండడంతో 'సరిలేరు నీకెవ్వరు' తర్వాత అనిల్ నెక్స్ట్ సినిమాకు స్టార్లు ఎవరూ అందుబాటులో లేరు. దీంతో 'F3' సినిమాను ప్లాన్ చేస్తున్నారని టాక్ వినిపించింది. అయితే వరుణ్ తేజ్.. వెంకటేష్ ఇతర సినిమాలతో బిజీగా ఉన్నారు కాబట్టి వెంటనే స్టార్ట్ చేయడం వీలు కాదు. సరిగ్గా ఈ సమయంలో అనిల్ రావిపూడికి అఖిల్ తో నెక్స్ట్ సినిమా చేసేందుకు అక్కినేని నాగార్జున ఓ సూపర్ ఆఫర్ ఇచ్చారని సమాచారం.

అనిల్ ఈ ఆఫర్ ను యాక్సెప్ట్ చేస్తే సినిమా పట్టాలెక్కెందుకు ఎక్కువ సమయం పట్టదని అంటున్నారు. అనిల్ రావిపూడి తన సినిమాలను టైట్ షెడ్యూల్స్ లో పూర్తి చేస్తారు కాబట్టి ప్రాజెక్ట్ ఓకే అయితే మాత్రం చకాచకా పూర్తి చేయడం ఖాయం. త్వరలోనే ఈ విషయంపై క్లారిటీ వచ్చే అవకాశం ఉందని అంటున్నారు.