రవితేజ-దిల్ రాజు కలిసిపోయారు

దిల్ రాజు బేనర్లో ‘భద్ర’ లాంటి సూపర్ హిట్ మూవీ చేశాడు మాస్ రాజా రవితేజ. మళ్లీ ఈ కాంబినేషన్లో సినిమా మొదలవడానికి దశాబ్దం పట్టింది. ఈ ఏడాది ఆరంభంలో వీళ్లిద్దరూ కలిసి ఓ సినిమా మొదలుపెట్టారు. ‘ఓ మై ఫ్రెండ్’ ఫేమ్ వేణు శ్రీరామ్ దర్శకత్వంలో ఈ సినిమా రావాల్సింది. ఐతే ప్రారంభోత్సవం కూడా జరుపుకున్నాక ఈ చిత్రం అనివార్య కారణాల వల్ల ఆగిపోయింది. పారితోషకం విషయంలో రవితేజకు.. దిల్ రాజుకు మధ్య తలెత్తిన అభిప్రాయ భేదాలే ఇందుకు కారణమని వార్తలొచ్చాయి. అందులో వాస్తవమెంతో కానీ.. ఇప్పుడు రవితేజ-దిల్ రాజు కాంబినేషన్లో మళ్లీ ఓ సినిమా మొదలు కానున్నట్లు సమాచారం.

పటాస్.. సుప్రీమ్ లాంటి సూపర్ హిట్లతో దర్శకుడిగా మంచి పేరు సంపాదించిన అనిల్ రావిపూడి డైరెక్షన్లో.. దిల్ రాజు బేనర్లో రవితేజ సినిమా చేయనున్నాడట. ‘సుప్రీమ్’ తర్వాత బాలయ్య.. రామ్.. జూనియర్ ఎన్టీఆర్ లాంటి హీరోల్ని ట్రై చేసిన అనిల్.. వాళ్లెవరితోనూ సినిమాను పట్టాలెక్కించలేకపోయాడు. తాజాగా అతను రవితేజకు కథ చెప్పి ఒప్పించినట్లు సమాచారం. అతడికి దిల్ రాజు బేనర్లోనే మరో రెండు సినిమాలకు కమిట్మెంట్ ఉంది. కాబట్టి ఆ బేనర్లోనే సినిమా చేయాల్సి ఉంటుందని రవితేజకు చెప్పాడట. దిల్ రాజుకు.. రవితేజకు గతంలో ఏం జరిగిందో కానీ.. ఇప్పుడైతే ఇద్దరూ కలిసి సినిమా చేయడానికి ఓకే చెప్పినట్లు సమాచారం. విశేషం ఏంటంటే.. రవితేజతో సినిమా చేయాల్సిన బాబీ.. ఎన్టీఆర్ తో సినిమా ఓకే చేయించుకున్నాడు. మరోవైపు ఎన్టీఆర్ తో సినిమా చేస్తాడనుకున్న అనిల్.. రవితేజ వైపు మళ్లాడు. ఇది భలే మలుపు కదా.


Like Us on Facebook : https://www.facebook.com/Tupakidotcom/