ఆన్ లొకేషన్ స్టిల్.. బిజీగా సూపర్ స్టార్!

సూపర్ స్టార్ మహేష్ బాబు - అనిల్ రావిపూడి కాంబినేషన్ లో తెరకెక్కుతున్న చిత్రం 'సరిలేరు నీకెవ్వరు'. ఒకవైపు మహేష్ వరస విజయాలతో దూకుడు మీద ఉండడం.. మరోవైపు అనిల్ రావిపూడి కంటిన్యూ గా హిట్స్ సాధిస్తూ ఫుల్ జోష్ లో ఉండడంతో ఈ కాంబినేషన్ పై భారీ ఆసక్తి నెలకొంది.

రీసెంట్ గా మహేష్ పుట్టినరోజు నాడు 'ది ఇంట్రో' అంటూ మహేష్ ఇంట్రడక్షన్ టీజర్ ను రిలీజ్ చేస్తే అందరికీ నచ్చింది. గడ్డం ఉందని.. మిలటరీ క్రూ కట్ లేదని కొన్ని విమర్శలు అక్కడక్కడ వినిపిస్తున్న వాటికి సంబంధం లేకుండా ఈ ఇంట్రో సినిమాపై బజ్ ను కాస్త పెంచింది. ఇక తాజాగా ఈ సినిమా నుండి మరో ఆన్ లొకేషన్ స్టిల్ బయటకు వచ్చింది. ఈ ఫోటోలో మహేష్ బాబుకు దర్శకుడు అనిల్ రావిపూడి సీన్ వివరిస్తూ ఉంటే మహేష్ ఎంతో శ్రద్ధగా వింటున్నాడు. బ్లాక్ టీ షర్ట్.. మిలిటరీ గ్రీన్ ప్యాంట్ ధరించి సూపర్ ఫిట్ గా కనిపిస్తున్నాడు. ఒక చేతిని ప్యాంట్ జేబులో పెట్టుకొని..మరో చేటలో స్మార్ట్ ఫోన్ తో స్టైలిష్ గా ఉన్నాడు. నేపథ్యంలో ఒక వాగు.. కొండలు ఉండడం చూస్తుంటే ఈ ఫోటో కశ్మీర్ షెడ్యూల్ లో తీసిన ఫోటోలా అనిపిస్తోంది.

ఈ సినిమాలో మహేష్ బాబు సరసన రష్మిక మందన్న హీరోయిన్ గా నటిస్తోంది. విజయశాంతి.. ప్రకాష్ రాజ్.. రమ్యకృష్ణ.. రాజేంద్రప్రసాద్ ఇతర కీలక పాత్రల్లో నటిస్తున్నారు. దేవీ శ్రీ ప్రసాద్ ఈ చిత్రానికి సంగీతం అందిస్తున్నాడు. అనిల్ సుంకర.. దిల్ రాజు ఈ సినిమాను సంయుక్తంగా నిర్మిస్తున్నారు.