నానితో నైనా లక్‌ కలిసి వచ్చేనా?

తమిళనాట కొలవెరిడీ అంటూ సంచలనం సృష్టించిన యువ సంగీత దర్శకుడు అనిరుథ్‌ తెలుగులో మాత్రం గుర్తింపు దక్కించుకోలేక పోయాడు. తెలుగులో ఈ యువ సంగీత కెరటం ‘అజ్ఞాతవాసి’తో ఎంట్రీ ఇచ్చాడు. దర్శకుడు త్రివిక్రమ్‌ ఈయనపై చాలా నమ్మకంతో పవన్‌ కళ్యాణ్‌ ను ఒప్పించి తెలుగులో పరిచయం చేశాడు. కాని అజ్ఞాతవాసి సినిమా ఫ్లాప్‌ అవ్వడంతో పాటు, ఈయన పాటలు కూడా కొట్టుకు పోయాయి. సినిమా సక్సెస్‌ అయితే అనిరుథ్‌ పాటలకు గుర్తింపు దక్కేది. కాని సినిమా ఫలితం తిరగబడటంతో అనిరుథ్‌ కు బ్యాడ్‌ నేమ్‌ వచ్చింది.

అజ్ఞాతవాసి సమయంలోనే త్రివిక్రమ్‌ మరో సినిమాకు కూడా అనిరుథ్‌ సంగీతం అందించే అవకాశం దక్కించుకున్నాడు. కాని త్రివిక్రమ్‌ తో తర్వాత సినిమా చేసిన ఎన్టీఆర్‌ తన మూవీకి అనిరుథ్‌ వద్దని సూచించడంతో థమన్‌ తో త్రివిక్రమ్‌ కానిచ్చాడట. తెలుగులో ప్రస్తుతం అనిరుథ్‌ రెండు సినిమాలు చేస్తున్నాడు. ఆ రెండు సినిమాలు కూడా నానితోనే చేస్తుండటం విశేషం. నాని హీరోగా గౌతమ్‌ దర్శకత్వంలో రూపొందుతున్న ‘జర్సీ’ చిత్రంకు అనిరుథ్‌ సంగీతాన్ని అందిస్తున్నాడు. తాజాగా నాని, విక్రమ్‌ కుమార్‌ ల కాంబినేషన్‌ లో తెరకెక్కబోతున్నట్లుగా ప్రకటించిన మూవీకి కూడా అనిరుథ్‌ సంగీతాన్ని అందించబోతున్నాడు.

నాని, విక్రమ్‌ మూవీకి మంచి క్రేజ్‌ ఉంది. ఇక విక్రమ్‌ మంచి సంగీత ప్రియుడని, ఆయన మంచి సాంగ్స్‌ ను మ్యూజిక్‌ డైరెక్టర్స్‌ నుండి రాబట్టుకుంటాడు అంటూ టాక్‌ ఉంది. అందుకే ఈ మూవీకి అనిరుథ్‌ మంచి పాటలు ఇవ్వడం ఖాయంగా భావిస్తున్నారు. నానితో చేస్తున్న ఈ రెండు మూవీలు సక్సెస్‌ అయితే తెలుగులో అనిరుథ్‌ బిజీ మ్యూజిక్‌ డైరెక్టర్‌ అవ్వడం ఖాయం. మరి నానితో అనిరుథ్‌ కు లక్‌ కలిసి వచ్చేనా చూడాలి.