ఓంకార్ సినిమాలో ఆ అమ్మాయి

ఈ ఏడాది దసరాకు పెద్దగా అంచనాల్లేకుండా విడుదలై సంచలన విజయం సాధించింది ‘రాజు గారి గది’ సినిమా. ఇందులో పెద్ద తారలెవరూ లేదు. డైరెక్టర్ ఓంకార్ కూడా ఇంతకుముందు పెద్ద ఫ్లాప్ తీసిన వాడే. నిర్మాతలూ కొత్తవాళ్లే. బడ్జెట్ కూడా చాలా తక్కువ. అయినప్పటికీ సినిమా అనూహ్య విజయం సాధించింది. పెట్టుబడి మీద మూడు రెట్లు రాబట్టి.. ఈ ఏడాది బిగ్గెస్ట్ హిట్స్ లో ఒకటిగా నిలిచింది. డైరెక్టరుగా తనకు లైఫ్ ఇచ్చిన ఈ సినిమాకు సీక్వెల్ కూడా చేయాలని భావిస్తున్నాడు ఓంకార్. ఇప్పటికే స్క్రిప్టు కూడా పూర్తయింది. ఇక నటీనటుల ఎంపిక మీద దృష్టిపెట్టాడు.

‘రాజు గారి గది’కి బడ్జెట్ సమస్యలున్నాయి. చాలా లిమిటేషన్స్ మధ్య సినిమా పూర్తి చేశాడు ఓంకార్. పేరున్న నటీనటుల్ని తీసుకునే అవకాశం లేకపోయింది. కానీ సీక్వెల్ కు ఆ ఇబ్బందేమీ లేదు. ఓ మోస్తరు బడ్జెట్లో తీయొచ్చు.
అందుకే అంజలి లాంటి పెద్ద హీరోయిన్ని ఈ సినిమాకు ఎంచుకున్నాడట ఓంకార్. ఇంతకుముందు అంజలి చేసిన హార్రర్ కామెడీ ‘గీతాంజలి’ కూడా హిట్టయిన నేపథ్యంలో ఓంకార్-అంజలి కాంబినేషన్ బాగానే వర్కవుట్ అవుతుందని భావిస్తున్నారు. మరి అంజలి పక్కన తన తమ్ముడు అశ్విన్ బాబునే ఓంకార్ హీరోగా పెడతాడా లేక హీరోను కూడా మార్చేస్తాడా అన్నది చూడాలి. రెండో భాగంలోనూ కమెడియన్ షకలక శంకర్ సందడి చేస్తాడని సమాచారం. ఫిబ్రవరిలో ఈ సినిమా సెట్స్ మీదికి వెళ్తుందట.