అంజలి రాడ్ పట్టుకుంది

అంజలి కెరీర్ మలుపులు తిరిగినట్లుగా సౌత్ ఇండియాలో మరే హీరోయిన్ కెరీర్ కూడా టర్న్ తీసుకుని ఉండదేమో. ముందు తెలుగులో ‘ఫొటో’ సినిమాతో అరంగేట్రం చేసింది. ఆ సినిమా ఫ్లాపవడంతో తమిళంలోకి వెళ్లి అక్కడ మంచి పేరు సంపాదించింది. అక్కడ మంచి రేంజిలో ఉండగా అనవసర వివాదాల పుణ్యమా అని.. అక్కడ్నుంచి అడ్రస్ మార్చేసి టాలీవుడ్ కు తిరిగొచ్చేసి మళ్లీ ఇక్కడ వరుసగా సినిమాలు చేసింది. తర్వాత మళ్లీ తమిళ సినిమాల వైపు చూసింది. ఇప్పుడు ఇటు తెలుగులో, అటు తమిళంలో సినిమాలు చేస్తూ బిజీ ఆర్టిస్టుగా కొనసాగుతోంది. ఇటీవలే బాలయ్య లాంటి స్టార్ హీరో సరసన ‘డిక్టేటర్’ సినిమా చేసి సక్సెస్ అందుకున్న అంజలి.. వెంటనే ఓ తమిళ సినిమా మొదలుపెట్టింది.

కన్బదు పొయ్.. ఇదీ అంజలి కొత్త సినిమా. సర్వేష్ అనే డెబ్యూ డైరెక్టర్ ఈ సినిమాను రూపొందిస్తున్నాడు. జనవరి 20న షూటింగ్ మొదలైంది. షూటింగ్ ఆరంభం కాగానే ఈ సినిమా ఫస్ట్ లుక్ పోస్టర్ కూడా రిలీజ్ చేసేశారు నిర్మాతలు. కార్లో కూర్చుని చేతిలో రాడ్ పట్టుకుని ఫెరోషియస్ గా కనిపిస్తోంది అంజలి. ఇది లేడీ ఓరియెంటెడ్ మూవీ అని ప్రత్యేకంగా చెప్పాల్సిన పని లేదు. ఇందులో అంజలి బ్యూటీషియన్ పాత్రలో కనిపించబోతుండటం విశేషం. మగాళ్ల మీద ఓ అభాగ్యురాలి పోరాటం నేపథ్యంలో ఈ చిత్రం తెరకెక్కుతోంది. దీన్ని తెలుగులోనూ విడుదల చేయాలని చూస్తున్నారు. దీంతో పాటు తమిళ, తెలుగు భాషల్లో ఐదారు ప్రాజెక్టులు అంజలి చేతిలో ఉన్నాయి.