కాంట్రవర్సీ క్వీన్ దర్శకత్వంలో మరో సినిమా

కంగనా రనౌత్ మల్టీ ట్యాలెంటెడ్ అయిన వివాదాస్పద నటి. తను ఏ వ్యాఖ్య చేసినా ఇండస్ట్రీ హాట్ టాపిక్ కావడం పక్కా. ఏ పని చేసినా అందులో తన శైలి కాంట్రవర్సీ ఉండేలా జాగ్రత్త పడుతుంది. ఎవరు ఏ విషయంపై స్పందించినా... తను రియాక్ట్ అవుతుంది. మొదట్లో సినిమాలపైనే దృష్టి పెట్టిన ఈ నటి.. క్రమంగా తన పంథాను రాజకీయాల్లోకి మార్చింది.

ఆ మధ్య భారత స్వాతంత్ర్యం విషయంలో వివాదాస్పద వ్యాఖ్యలు చేశారనే ఆరోపణలపై ఈ బాలీవుడ్ నటిపై దేశవ్యాప్తంగా తీవ్ర విమర్శలు వ్యక్తమయ్యాయి. ఆమెకు ఇచ్చిన పద్మశ్రీ పురస్కారాన్ని వెంటనే వెనక్కి తీసుకోవాలని డిమాండ్్ చేస్తూ ఇప్పటికే పలు రాజకీయ పార్టీలు దేశవ్యాప్తంగా ఆందోళన చేపట్టాయి.

తన చుట్టూ ఎన్ని వివాదాలు చుట్టు ముట్టినా తను మాత్రం ఎక్కడా వెనక్కి తగ్గే రకం కాదు. నిత్యం వివాదాల్లో ఉండటం తన నైజం. ఎంత పెద్ద సినీ సెలబ్రిటీ అయినా.. రాజకీయ నాయకులనైనా తనదైన శైలిలో రఫ్పాడిస్తుంది ఈ బాలీవుడ్ క్వీన్. కానీ ట్యాలెంటెడ్ లో మాత్రం ఎవరికీ తీసిపోదు ఈ భామ.

అందంతో పాటు అభినయం కంగనా సొంతం. బాధ్యతలను పక్కాగా నెరవేర్చడంలో.. ఎంత మందినైనా ఒంటి చేతితోనే పని చేయించుకునే సత్తా ఆమె సొంతం.

ఆ మధ్య క్రిష్ దర్శకత్వంలో, కంగనా ప్రధాన పాత్రలో మణికర్ణిక అనే సినిమా మొదలైంది. అయితే ఇగో క్లాష్ లేదా ఇంకేదైనా కారణమో తెలియదు కానీ క్రిష్ మధ్యలోనే సినిమాను అర్థాంతరంగా వదిలి పెట్టి వెళ్లిపోయారు. ఆ సినిమా బాధ్యతలను నెత్తికెత్తుకున్న కంగనా... ఆ సినిమాను విజయవంతంగా పూర్తి చేశారు. దాంతో పాటు క్రిష్ లేని లోటు ఎక్కడా కనిపించకుండా తన దైన నైపుణ్యంతో సినిమాను తీర్చిదిద్దారు. మణికర్ణిక ఆఖరికి విడుదలై సూపర్ హిట్ అయింది.

అయితే ఈ అనుభవంతోనే కంగనా మరో ప్రాజెక్టును మొదలుపెట్టనుంది. ప్రస్తుతం ఆమె త్వరలో మరో ప్రాజెక్ట్‌కి దర్శకత్వం వహించబోతున్నట్లు సమాచారం. ఈ సినిమాని ఆమె స్వయంగా నటించి, నిర్మించి, దర్శకత్వం వహించనుందన్న మాట. కంగనా ఏక్తా కపూర్ కోసం ఓటీటీ షోను నిర్వహిస్తోంది, ఇది తగినంత సందడిని సృష్టించింది. ప్రస్తుతం ఆమె తన కెరీర్‌లో పలు చిత్రాల షూటింగ్‌లలో బిజీగా ఉంది.