మహానటి దర్శకుడు మరో భారీ ప్రయత్నం!

దర్శకుడు నాగ్ అశ్విన్ దర్శకత్వం వహించింది రెండే సినిమాలు కానీ ఓ ఇరవై సినిమాలు చేస్తే తప్ప సాధించలేని పేరు మాత్రం సాధించాడు. మొదటి సినిమా 'ఎవడే సుబ్రహ్మణ్యం'తో మంచి అభిరుచి కలిగిన ఫిలిం మేకర్ గా పేరు తెచ్చుకున్న నాగ్ అశ్విన్.. తన రెండవ చిత్రం 'మహానటి' తో ప్రేక్షకుల జేజేలు.. విమర్శకులతో ప్రశంసలు అందుకున్నాడు. అయితే 'మహానటి' విడుదలై ఇప్పటికి చాలా రోజులైనా తన తదుపరి చిత్రం ఎదన్న విషయంపై క్లారిటీ రాలేదు.

తాజాగా ఈ విషయంపై కొంత క్లారిటీ వచ్చింది. వైజయంతి మూవీస్ బ్యానర్ పై ఒక భారీ చిత్రానికి శ్రీకారం చుట్టబోతున్నాడు నాగ్ అశ్విన్. హీరో ఎవరు.. హీరోయిన్ ఎవరు లాంటి కీలకమైన విషయాలు ఇంకా వెల్లడి కాలేదు కానీ విజువల్ ఆర్టిస్ట్స్.. డిజైనర్స్.. రచయితలు కావాలంటూ వైజయంతీ మూవీస్ వారు ఒక ప్రకటన విడుదల చేశారు. "మేము ఒక భారీ ప్రయత్నం చేయబోతున్నాం.. ఈ ఎగ్జైటింగ్ జర్నీలో భాగస్వాములు అయ్యేందుకు విజువల్ ఆర్టిస్టులు.. డిజైనర్లు.. రచయితలకు స్వాగతం పలుకుతున్నాం. ఈ ఎడ్వెంచర్ సెప్టెంబర్ 2019 లో ప్రారంభం కానుంది. ఎ ఫిలిం బై నాగ్ అశ్విన్" అంటూ వెల్లడించారు. ఔత్సాహికులు vymtalent@gmail.com కు వారి వివరాలను మెయిల్ పంపాలని కోరారు.

ఈ సందర్భంగా విడుదల చేసిన పోస్టర్ లో పొడవాటి టవర్లు.. చూస్తుంటే ఏదో సైఫై ఫిలిం.. లేదా సోషియో ఫాంటసీ ఫిలిం ప్లాన్ చేస్తున్నారేమో అనిపిస్తోంది. 'మహానటి' తర్వాత నాగ్ అశ్విన్ సినిమా ఎప్పుడు మొదలవుతుందా అని ఆసక్తిగా ఎదురు చూస్తున్న ప్రేక్షకులకు ఇదో గుడ్ న్యూస్ అనే చెప్పాలి.