ఓటీటీలో మరో ఆసక్తికరమైన వెబ్ సిరీస్ 'గాలివాన'

ప్రస్తుతం డిజిటల్ ఫ్లాట్ ఫార్మ్స్ హవా నడుస్తున్న నేపథ్యంలో, ప్రేక్షకులను అంతులేని వినోదాన్ని అందించేందుకు ఓటీటీలన్నీ పోటాపోటీగా ఎప్పటికప్పుడు సరికొత్త కంటెంట్ ను స్ట్రీమింగ్ పెడుతున్నాయి. ఇటీవల కాలంలో తెలుగు మీద ప్రత్యేక దృష్టి పెట్టిన జీ5 ఓటీటీ.. సూపర్ హిట్ సినిమాలు - ఒరిజినల్ వెబ్ సిరీస్ లతో దూసుకుపోతోంది.

ఈ మధ్య కాలంలో జీ5 ఓటీటీలో స్ట్రీమింగ్ అయిన 'ఒక చిన్న ఫ్యామిలీ స్టోరీ' 'లూజర్ 2' వంటి పలు తెలుగు వెబ్ సిరీస్ లకు ప్రేక్షకుల నుంచి అనూహ్య స్పందన లభించింది. ఈ క్రమంలో లేటెస్టుగా ''గాలివాన'' అనే మరో ఇంట్రెస్టింగ్ ఒరిజినల్ సిరీస్ ని అందుబాటులోకి తీసుకొస్తోంది.

అలనాటి నటి రాధికా శరత్ కుమార్ - డైలాగ్ కింగ్ సాయికుమార్ ప్రధానపాత్రధారులుగా రూపొందించబడిన 'గాలివాన' వెబ్ సిరీస్ ఈరోజు అర్థరాత్రి (ఏప్రిల్ 14) నుంచి జీ5 లో స్ట్రీమింగ్ కానుంది. ఇప్పటికే విడుదలైన టీజర్ - ట్రైలర్ ఈ సిరీస్ పై ఆడియన్స్ లో ఆసక్తి కలిగించాయి.

జంట హత్యల మిస్టరీ నేపథ్యంలో ఆద్యంతం ఉత్కంఠ భరితంగా 'గాలివాన' సిరీస్ ను రూపొందించినట్లు ప్రమోషనల్ కంటెంట్ చూస్తే అర్థం అవుతుంది. ఇందులో రెండు ఫ్యామిలీల మధ్య ఎమోషన్స్ తో పాటు సస్పెన్స్ - క్రైమ్ థ్రిల్లింగ్ అంశాలు మిలితమై ఉన్నాయి.

గతంలో అనేక క్రైమ్ థ్రిల్లర్స్ వచ్చినప్పటికీ.. 'గాలివాన' లో మాత్రం సెంటిమెంట్ తో కూడిన క్రైమ్ థ్రిల్లింగ్ ఎలిమెంట్స్ ఎమోషనల్ గా కనెక్ట్ అయ్యేలా చేస్తాయని భావించవచ్చు. గౌరా హరి సమకూర్చిన బ్యాగ్రౌండ్ స్కోర్ - సినిమాటోగ్రాఫర్ సుజాత సిద్దార్థ్ అందించిన విజువల్స్ ప్రధాన ఆకర్షణగా నిలవనున్నాయి.

''గాలివాన'' వెబ్ సిరీస్ కు 'తిమ్మరుసు' ఫేమ్ శరణ్ కొప్పిశెట్టి దర్శకత్వం వహించారు. జీ స్టూడియోస్ సమర్పణలో బీబీసీ స్టూడియోస్ మరియు నార్త్ స్టార్ బ్యానర్స్ పై సమీర్ గోగాటే - శరత్ మరార్ సంయుక్తంగా ఈ ఒరిజినల్ సిరీస్ ను నిర్మించారు. ఈ సిరీస్‌ తో బిబిసి రీజనల్‌ ఎంటర్‌టైన్‌మెంట్‌ లోకి అడుగు పెడుతోంది.

ఇందులో చాందినీ చౌదరి - చైతన్య కృష్ణ - అశ్రిత వేముగంటి - నందిని రాయ్ - తాగుబోతు రమేశ్ - శరణ్య ప్రదీప్ - అర్మాన్ తదితరులు కీలక పాత్రలు పోషించారు. ఎన్నో విజయవంతమైన సినిమాల్లో సీరియల్స్ లో నటించిన రాధికా శరత్‌ కుమార్‌ కు ఇది ఓటీటీ డెబ్యూ. మరి 'గాలివాన' వెబ్ సిరీస్ ఎలాంటి రెస్పాన్స్ అందుకుంటుందో చూడాలి.