ప్రభాస్‌ మూవీ కంటే ముందు నాగ్‌ అశ్విన్‌ దర్శకత్వంలో...!

మహానటి చిత్రం తర్వాత ప్రభాస్‌ తో సినిమాకు నాగ్‌ అశ్విన్‌ రెడీ అయిన విషయం తెల్సిందే. వచ్చే ఏడాది సమ్మర్‌ తర్వాత ప్రభాస్‌ తో సినిమాను మొదలు పెట్టేందుకు ఏర్పాట్లు చేస్తున్నాడు. భారీ బడ్జెట్‌ తో వైజయంతి మూవీస్‌ బ్యానర్‌ లో అశ్వినీదత్‌ ఈ సినిమాను నిర్మించబోతున్నాడు. ప్రభాస్‌.. నాగ్‌ అశ్విన్‌ కాంబో మూవీపై అంచనాలు ఆకాశాన్ని తాకేలా ఉన్నాయి. అంచనాలకు తగ్గట్లుగా ఈ సినిమాను పాన్‌ వరల్డ్‌ మూవీగా రూపొందించే పనిలో దర్శకుడు నాగ్‌ అశ్విన్‌ ఉన్నాడు. అయితే ప్రభాస్‌ తో మూవీ కంటే ముందే నాగ్‌ అశ్విన్‌ దర్శకత్వంలో మరో ప్రాజెక్ట్‌ రాబోతుంది.

హిందీలో సెన్షేషన్‌ క్రియేట్‌ చేసిన వెబ్‌ సిరీస్‌ లస్ట్‌ స్టోరీస్‌ ను తెలుగులో రీమేక్‌ చేస్తున్న విషయం తెల్సిందే. హిందీలో నాలుగు ఎపిసోడ్ ను వేరు వేరు దర్శకులు డైరెక్ట్‌ చేశారు. తెలుగులో కూడా నాలుగు ఎపిసోడ్‌ లకు నలుగురు దర్శకులు డైరెక్ట్‌ చేస్తున్నారు. అందులో ఒక ఎపిసోడ్‌ కు నాగ్‌ అశ్విన్‌ దర్శకత్వం వహించాడు. ఈ ఏడాది చివరి వరకు ఆ వెబ్‌ సిరీస్‌ ను స్ట్రీమింగ్‌ చేయబోతున్నారు. టాలీవుడ్‌ కు చెందిన స్టార్స్‌ తో ఈ వెబ్‌ సిరీస్ ను తెరకెక్కించారు. నాగ్‌ అశ్విన్‌ దర్శకత్వంలో రూపొందిన వెబ్‌ సిరీస్‌ అవ్వడంతో ఆసక్తి ఉంది.

తెలుగు లస్ట్‌ స్టోరీ ను డిసెంబర్‌ లేదా వచ్చే ఏడాది జనవరిలో ప్రసారం చేసేందుకు చకచక పోస్ట్‌ ప్రొడక్షన్‌ వర్క్‌ జరుగుతోంది. కనుక ప్రభాస్‌ తో మూవీ సినిమా రాకముందే లస్ట్‌ స్టోరీ తెలుగు వర్షన్‌ తో నాగ్‌ అశ్విన్‌ దర్శకుడిగా తన ప్రాజెక్ట్‌ ను ప్రేక్షకుల ముందుకు తీసుకు రాబోతున్నాడు. ఇక ప్రభాస్‌ తో సినిమాను 2022లో ప్రేక్షకుల ముందుకు తీసుకు రాబోతున్నాడు. దీపిక పదుకునే ఈ సినిమాలో నటిస్తున్న విషయం తెల్సిందే. హాలీవుడ్‌ టెక్నీషియన్స్‌ తో ప్రభాస్‌ మూవీని రూపొందించబోతున్నాడు.