చైతూ కోసం ఆమెనే 'అను'కుంటున్నారు

నాని హీరోగా నటించిన మజ్ను సినిమాతో టాలీవుడ్ లోకి అడుగుపెట్టింది మళయాళ సుందరి అను ఇమ్మానుయేల్. నాజూకైన అందాలు.. పెదవి చివర విరిసీ విరియని చిరునవ్వుతో మత్తెక్కించే చూపులతో కనిపించే ఈ భామకు టాలీవుడ్ లో అవకాశాలు వెతుక్కుంటూ వస్తున్నాయి. ఇప్పటికే మెగా క్యాంపులో ఇద్దరు టాప్ హీరోలతో నటించే లక్కీ ఛాన్స్ కొట్టేసింది. పవన్ కళ్యాణ్ - అల్లు అర్జున్ పక్కన ఒకేసారి హీరోయిన్ గా నటిస్తోంది అను ఇమ్మానుయేల్.

ఈ సినిమాలు ఇంకా ప్రొడక్షన్ దశలోనే ఉండగా మరో ఛాన్స్ అను తలుపు తట్టింది. మారుతి దర్శకత్వంలో నాగచైతన్య హీరోగా నటించే సినిమాకు అను ఇమ్మానుయేల్ ను ఎంపిక చేశారు. పవన్ కళ్యాణ్ తో సినిమా తీస్తున్న నిర్మాతల టీంలోని వారే మారుతి సినిమాను కూడా ప్రొడ్యూస్ చేస్తున్నారు. దీంతో అను ఎంపిక మరింత సులువైంది. ‘‘సినిమాలో పాత్ర గురించి ఇప్పటికే ఆమెకు వివరించాం. స్క్రిప్ట్ - సినిమాలో క్యారెక్టర్ కూడా ఆమెకు నచ్చాయి’’ అని యూనిట్ సభ్యుడొకరు తెలిపారు.

అను ఇమ్మానుయేల్ మజ్ను సినిమాతో పాటు రాజ్ తరుణ్ హీరోగా నటించిన కిట్టు ఉన్నాడు జాగ్రత్త సినిమాలో నటించింది. ఈ రెండు సినిమాలు యావరేజ్ గానే ఆడినా స్టార్ హీరోల పక్కన అవకాశాలు దక్కించుకుంది. దీంతోపాటు గోపీచంద్ పక్కన నటించిన ఆక్సిజన్ ఇంకా రిలీజ్ కావాల్సి ఉంది. ఈ సినిమాలన్నీ హిట్ కొడితే అను ఇమ్మానుయేల్ స్టార్ హీరోయిన్ స్టేటస్ దక్కించుకోవడం ఖాయం.