నాకు పొగరెక్కువ అంటున్న అను

నాగ చైతన్య హీరోగా మారుతీ దర్శకత్వంలో రూపొందుతున్న శైలజారెడ్డి అల్లుడు షూటింగ్ స్మూత్ గా జరిగిపోతోంది. అను ఇమ్మానియేల్ హీరోయిన్ గా నటిస్తున్న ఈ సినిమాలో చైతు అత్తయ్యగా రమ్యకృష్ణ చేస్తున్న సంగతి తెలిసిందే. ఆవిడ త్వరలోనే సెట్ లోకి అడుగు పెట్టనున్నారు. ఇకపోతే ఇందులో పాత్రల గురించి వాటి తీరుతెన్నుల గురించి రకరకాల ఊహాగానాలు ఉన్నాయి కానీ అను మాత్రం తన వరకు చిన్న క్లూ ఇచ్చింది. తన పాత్ర చాలా యాటిట్యూడ్ తో ఉంటుందని ఇంతకు మించి చెప్తే బాగుండదని చెబుతూ ఇలా నటించడం సరికొత్తగా ఫీల్ అవుతున్నాను అని చెప్పింది. అంటే దేన్నీ లెక్క చేయకుండా చైతుకి సవాల్ విసిరే పాత్రలో అనుని చూడబోతున్నాం. రమ్య కృష్ణ కూతురిగా అను కనిపిస్తుందన్న మాట. అత్త అల్లుళ్ళ డ్రామాలో సహజంగానే మధ్యలో ఉండే కూతురి పాత్ర పొగరుబోతుతనంగానే ఉంటుంది. మారుతీ కూడా అదే ఫార్ములాలో వెళ్తున్నట్టు కనిపిస్తోంది.

ఈ మధ్య ఇలాంటి లైన్ తో సినిమా వచ్చి చాలా ఏళ్ళు అయ్యింది. నాగార్జున అల్లరి అల్లుడులో నగ్మా-చిరంజీవి అత్తకు యముడు అమ్మాయికి మొగుడులో విజయశాంతి లాంటి తరహా పాత్రలు పైన అను చెప్పిన యాటిట్యూడ్ తో ఉన్నవే. సో ఆ స్ఫూర్తితో మారుతీ ఇప్పుడున్న ట్రెండ్ కి తగ్గట్టు ఏమైనా కొత్తగా తీర్చిదిద్దాడేమో వేచి చూడాలి. అను ఇమ్మానియేల్ కి ఈ సినిమా హిట్ కావడం చాలా కీలకం. ఈ ఏడాది మెగా హీరోలతో చేసిన రెండు సినిమాలు అజ్ఞాతవాసి-నా పేరు సూర్య ఆశించిన ఫలితం ఇవ్వలేదు. శైలజారెడ్డి అల్లుడు మాత్రం తనకు కోరుకున్న బ్రేక్ ఇస్తుందని ఆశగా ఎదురు చూస్తోంది. మరి ఎంటర్ టైనర్స్ ని బాగా డీల్ చేస్తాడని పేరున్న మారుతీ ఇది కూడా అలా తీర్చిదిద్దగలిగితే అను కోరిక నెరవేరినట్టే. తమన్నాతో స్పెషల్ సాంగ్ ప్లాన్ చేసిన ఈ మూవీ షూటింగ్ నాలుగు నెలల్లో పూర్తి చేసి అక్టోబర్ లో విడుదల చేసేలా ప్లానింగ్ లో ఉంది యూనిట్