ఎన్టీఆర్ వద్దంటే చైతు పక్కన సర్దాడు

ఒక్క సినిమాతో ఫేట్ మారిపోవడం ఫిలిం ఇండస్ట్రీలో చూస్తూనే ఉంటాం. ఒక్క చిత్రంతో స్టార్స్ అయిపోయే వాళ్లతో పాటే.. ఒక్క ఫ్లాప్ తో ఇబ్బందులు పడేవాళ్లు కూడా ఉంటారు. ప్రస్తుతం టాలీవుడ్ లో తెగ బూమ్ లో ఉన్న హీరోయిన్ గా గుర్తింపు పొందిన అను ఇమాన్యుయేల్ పరిస్థితి రెండో రకంగా ఉంది.

పవన్ కళ్యాణ్ మూవీ అజ్ఞాతవాసి రిలీజ్ అయ్యేవరకూ ఈ భామ క్రేజీ హీరోయినే. కానీ ఆ చిత్రం డిజాస్టర్ గా నిలవడంతో.. ఇప్పుడీ భామను వద్దనుకునే వారే ఎక్కువగా కనిపిస్తున్నారు. గతంలో చేతికి చిక్కిన ప్రాజెక్టులు కూడా ఇప్పుడు జారిపోతున్నాయి. హీరోయిన్స్ ను రిపీట్ చేసే అలవాటు ఉన్న త్రివిక్రమ్.. తను తర్వాత తీయబోయే ఎన్టీఆర్ చిత్రానికి కూడా అను ఇమాన్యుయేల్ ను హీరోయిన్ గా తీసుకోవాలని తలచాడు. కానీ అజ్ఞాతవాసి ఫ్లాప్ లో ఈమెకు కూడా ఇండస్ట్రీ వాటా ఇచ్చేయడంతో.. ఈ మలయాళీ కుట్టిని వద్దనేశాడట ఎన్టీఆర్. కథ విషయంలో జోక్యం చేసుకోకుండా.. హీరోయిన్ వరకే అబ్జెక్ట్ చేయడంతో అంగీకరించాడట త్రివిక్రమ్.

తన సినిమాలో ఇప్పుడప్పుడే తీసుకునే అవకాశం లేకపోవడంతో.. తనకు బాగా సన్నిహితులు అయిన హారిక అండ్ హాసినీ బ్యానర్ పై నాగచైతన్య హీరోగా నటిస్తున్న సినిమాలో ఆఫర్ ఇప్పించాడట త్రివిక్రమ్ శ్రీనివాస్. అలా యంగ్ టైగర్ పక్కన సినిమా చేసే అవకాశం కోల్పోయినా.. చైతుతో సినిమాతో సరిపెట్టుకుంటోందట అను.