మల్లూ సినిమాలకు డేట్స్ దొరకట్లేదట

అనుపమా పరమేశ్వరన్ ఇప్పుడు టాలీవుడ్ లో బిజీ హీరోయిన్స్ జాబితాలో చేరిపోయింది. మలయాళ బ్లాక్ బస్టర్ ప్రేమమ్ తో తన ట్యాలెంట్ ను చూపిన ఈ భామకు.. తెలుగులో కూడా ఆ పాత్రను ఆమెతోనే చేయించారు. అంతకంటే ముందు అఆ చిత్రంతో అనుపమను తెలుగు ఇండస్ట్రీకి పరిచయం చేశాడు దర్శకుడు త్రివిక్రమ్ శ్రీనివాస్. ఆమె లాంటి ప్రతిభావంతులు ఇండస్ట్రీకి చాలా అవసరం అని త్రివిక్రమ్ చెప్పిన మాటలు.. అనుపమ కెరీర్ పై బాగానే ప్రభావం చూపించాయి.

తెలుగులో నాగచైతన్య.. శర్వానంద్ లాంటి హీరోలు వరుసగా ఆమెకు అవకాశాలు కట్టబెట్టేశారు. గతేడాది ప్రారంభంలో శతమానం భవతి అంటూ బ్లాక్ బస్టర్ కొట్టిన తర్వాత.. ఈమె నుంచి ఉన్నది ఒకటే జిందగీ అంటూ ఒక్క సినిమా మాత్రమే వచ్చింది. ఇప్పుడు తక్కువ గ్యాప్ లోనే రెండు సినిమాలను తెచ్చేయనుంది అనుపమ. ఈ వారంలో రిలీజ్ కాబోతోన్న నాని మూవీ కృష్ణార్జున యుద్ధంలో అనుపమ ఒక హీరోయిన్ గా నటించింది. జీవితంలో స్ట్రెయిట్ ఫార్వార్డ్ గా ప్రవర్తించే రోల్ తనది అని చెబుతున్న ఈ భామ.. తన పాత్రకు సంబంధించిన సన్నివేశాలను ఎక్కువగా ప్రేగ్ నగరంలో చిత్రీకరించారని అంటోంది. అంతకు మించి ఈ పాత్ర గురించి మరే డీటైల్ ను చెప్పలేనని అంటోంది అనుపమ.

తేజుతో కరుణాకరన్ తీస్తున్న మూవీ..మరోవైపు త్రినాథరావు నక్కిన దర్శకత్వంలో రామ్ హీరోగా రూపొందుతున్న హలో గురూ ప్రేమ కోసమేరా చిత్రంలో కూడా అనుపమే హీరోయిన్. ఇంకా చేయాల్సిన మూవీ లిస్ట్ చాలానే ఉంది. కానీ తెలుగులో వరుసగా నటిస్తున్న ఈ భామ.. తన హోమ్ ఇండస్ట్రీ అయిన మలయాళంలో మాత్రం అడపా దడపా మాత్రమే చేస్తోది. జొమొంటే సువిశేషాంగల్ చిత్రంలో మాత్రమే కనిపించింది. మలయాళం నుంచి ఆఫర్ వచ్చిన ప్రతీసారి.. తెలుగు సినిమాలతో బిజీగా ఉంటున్నానని.. అందుకే మలయాళీ చిత్రాలకు డేట్స్ అడ్జస్ట్ చేయలేకపోయానని అంటోంది అనుపమ.