అనుపమ చెక్ పెట్టేసిందిగా!

ఆన్ లైన్ వెబ్ న్యూస్ తో పాటు సోషల్ మీడియా విస్తృతంగా పెరిగిన నేపధ్యంలో చిన్న గాసిప్ కూడా బ్రహ్మాండమైన ప్రచారం దక్కించుకుంటోంది. బైట్ దొరికితే చాలు దాని మీద రకరకాల కథనాలు అల్లేసి మరీ ప్రచారం చేస్తున్నారు. నిన్నటికి నిన్న రంగస్థలంలో రామ్ చరణ్ పక్కన అసిస్టెంట్ గా నటించిన మహేష్ పోయారు అంటూ ఒక యు ట్యూబ్ ఛానల్ న్యూస్ పెట్టడంతో ఏకంగా అతనే స్వయంగా ఫేస్ బుక్ లైవ్ లోకి వచ్చి నేను బ్రతికి ఉన్నాను మహాప్రభో అంటూ చెప్పుకోవాల్సి వచ్చింది. ఇదిలా ఉంచితే నిన్న మరో వెబ్ సైట్ లో ప్రకాష్ రాజ్ అనుపమ పరమేశ్వరన్ మధ్య ఏదో గొడవ జరిగిందని కోపం అదుపు చేసుకోలేకపోయిన ప్రకాష్ రాజ్ గట్టిగా అరవడంతో అనుపమ కన్నీటి పర్యంతం అయ్యిందని ప్రచురించింది. ఇంకేముంది. ఇది కాస్త వైరల్ అయిపోయి హాట్ టాపిక్ గా మారింది. విషయం అనుపమ దాకా వెళ్ళింది.

ఇది రామ్ నటిస్తున్న హలో గురు ప్రేమ కోసమే షూటింగ్ సందర్భంగా జరిగిందని అందులో ప్రస్తావించారు. కానీ వాటికీ చెక్ పెడుతూ అనుపమ ప్రకాష్ రాజ్ తో కలిసున్న ఫోటో ట్విట్టర్ లో పోస్ట్ చేస్తూ ఈ జోకులు భలే ఉన్నాయి ప్రకాష్ రాజ్ సర్ అంటూ చిన్న కోటింగ్ ఇచ్చింది. దీంతో ఈ ప్రచారాలకు చెక్ పడిపోయింది. గత నెల అరవింద సమేత వీర రాఘవ షూటింగ్ లో కమెడియన్ శ్రీనివాసరెడ్డికి హీరో జూనియర్ ఎన్టీఆర్ కు ఇలాగే యేవో విభేదాలు ఉన్నాయి అంటే త్రివిక్రమ్ ఇద్దరితో కలిసి తానున్న సెల్ఫీని సోషల్ మీడియాలో పెట్టాక కానీ వాటికి చెక్ పడలేదు. అచ్చంగా అదే తరహాలో ఇప్పుడు ప్రకాష్ రాజ్ అనుపమ ఇష్యూ పుట్టించారు. ఏదైతేనేం కథ సుఖాంతం అయ్యింది. త్రినాథ రావు దర్శకత్వంలో రూపొందుతున్న హలో గురు ప్రేమ కోసమే దిల్ రాజు నిర్మాణంలో షూటింగ్ జరుపుకుంటోంది. నేను లోకల్ తర్వాత త్రినాథ రావు చేస్తున్న మూవీ ఇదే.