అనుష్క సినిమా.. అస్సలు తగ్గట్లేదు

సౌత్ ఇండియాలో హీరోలతో సమానంగా ఇమేజ్ ఉన్న హీరోయిన్ అనుష్క. ఒకప్పుడు హీరోయిన్ల మీద పది కోట్లు పెట్టుబడి పెట్టడానికి కూడా ఆలోచించేవాళ్లు. కానీ అనుష్క ‘అరుంధతి’ సాధించిన విజయం చూశాక.. హీరోయిన్ల మీద భారీగా పెట్టుబడి పెట్టేస్తున్నారు. అందులోనూ అనుష్క విషయంలో అయితే కళ్లు మూసుకుని ఖర్చు పెట్టేస్తున్నారు. వర్ణ.. రుద్రమదేవి.. సైజ్ జీరో.. ఇవన్నీ భారీ బడ్జెట్ సినిమాలే. అనుష్క కొత్త సినిమా ‘భాగమతి’ విషయంలోనూ నిర్మాతలు అస్సలు తగ్గట్లేదు. థ్రిల్లర్ తరహా సినిమా అంటే తక్కువ బడ్జెట్లో ముగించేస్తారేమో అనుకుంటే.. దీనికి కూడా పాతిక కోట్ల దాకా ఖర్చు పెట్టేస్తున్నట్లు సమాచారం.

‘భాగమతి’ కోసం భారీ మహల్ సెట్ వేసి అందులోనూ షూటింగ్ చేస్తున్నారట. ఈ సెట్ కోసమే కొన్ని కోట్లు ఖర్చయినట్లు సమాచారం. రిచ్ లొకేషన్లలో హై టెక్నికల్ వాల్యూస్ తో ఈ చిత్రాన్ని తెరకెక్కిస్తున్నాడు ‘పిల్ల జమీందారు’ ఫేమ్ అశోక్. కొంత వరకు షూటింగ్ విదేశాల్లో కూడా జరుగుతందట. ఆది పినిశెట్టి.. ఉన్నిముకుందన్ (జనతా గ్యారేజ్ విలన్).. టబు ప్రధాన పాత్రలు పోషిస్తున్న ఈ సినిమా ఓ టెక్నో థ్రిల్లర్ అంటున్నారు. ప్రభాస్ మిత్రులైన వంశీ.. ప్రమోద్ ‘యువి క్రియేషన్స్’ బేనర్లో ఈ చిత్రాన్ని నిర్మిస్తున్నారు. ఈ చిత్రంలో ప్రభాస్ కూడా ఓ క్యామియో రోల్ చేస్తాడని ప్రచారం జరుగుతోంది. ఈ ఏడాది చివర్లోపు ఈ సినిమా చిత్రీకరణ పూర్తయ్యే అవకాశముంది.