నాగ్ కోసం అనుష్క‌

నాగార్జున-కార్తీ క‌లిసి న‌టిస్తున్న మ‌ల్టీస్టార‌ర్ సినిమాకి రోజు రోజుకీ క‌ల‌రింగ్ పెరుగుతున్న‌ట్టుంది. మొన్న‌టిదాకా హీరోయిన్ త‌మ‌న్నా ఒక్క‌టేనేమో అనుకొన్నాం. సినిమా లో కార్తీ కి త‌ప్ప నాగ్‌ కి జోడీ లేదేమో అని ఊహించాం. కానీ ఉన్న‌ట్టుండి ఓ ఫారిన్ మోడ‌ల్‌ ని సెట్ చేశారు. సౌతాఫ్రికా కి చెందిన గాబ్రియాలా అన్న మోడ‌ల్ నాగ్ స‌ర‌స‌న ఆడిపాడ‌బోతున్న విష‌యం తెలిసిందే. ఇద్ద‌రు హీరోల‌కు, ఇద్ద‌రు హీరోయిన్లు. లెక్క స‌రిపోయిందన్న‌మాట‌.

అయితే ఇప్పుడు సినిమాలో మ‌రో హీరోయిన్ కూడా క‌నిపించ‌బోతోంద‌ని ప్ర‌చారం సాగుతోంది. అనుష్క ఓ గెస్ట్ రోల్‌ లో సందడి చేయ‌బోతోంద‌ని ఫిల్మ్‌ న‌గ‌ర్ వ‌ర్గాల స‌మాచారం. సినిమాకి కీల‌క‌మైన ఆ గెస్ట్ రోల్‌ లో ఓ స్టార్ హీరోయిన్ అయితే బాగుంటుంద‌ని ద‌ర్శ‌కుడు వంశీ పైడిప‌ల్లి చెప్ప‌డంతో నిర్మాత‌లు అనుష్క‌ ని సంప్ర‌దించారు. పీవీపీ సంస్థ‌కీ, అనుష్క‌కీ మ‌ధ్య మంచి అనుబంధం ఉంది. పీవీపీ నిర్మిస్తున్న `సైజ్ జీరో`లోనూ అనుష్కనే హీరోయిన్‌. అందుకే ఆమె నిర్మాత‌లు అడ‌గ్గానే వెంట‌నే ఓకే చెప్పేసింద‌ట‌. పైగా నాగార్జున సినిమా అంటే అనుష్క వ‌ద్ద‌నే ప్ర‌స‌క్తే లేదు.

వంశీ పైడిప‌ల్లి ద‌ర్శ‌క‌త్వంలో తెర‌కెక్కుతున్న నాగార్జున‌-కార్తీ సినిమా ప్ర‌స్తుతం ప్యారిస్‌ లోని ఈఫిల్ ట‌వ‌ర్ ద‌గ్గ‌ర చిత్రీక‌ర‌ణ జ‌రుపుకొంటోంది. నెల రోజులుగా టీమ్ అక్క‌డే ఉంది. త్వ‌ర‌లోనే ఇండియాకి తిరిగి రాబోతున్నారు. నాగార్జున‌కి అచ్చొచ్చిన డిసెంబ‌రు నెల‌లోనే ఈ సినిమాని విడుద‌ల చేయ‌బోతున్నార‌ని తెలుస్తోంది. ఓ ఫ్రెంచ్ సినిమా స్ఫూర్తితో తెర‌కెక్కుతున్న‌ట్టు మీడియాలో క‌థ‌నాలొస్తున్నాయి. నాగ్ చాలా స‌న్నివేశాల్లో వీల్ చైర్లో కూర్చునే వినోదాలు పండించ‌బోతున్నాడ‌ట‌. సినిమాకి `మిత్రులు` అనే టైటిల్‌ ని ప‌రిశీలిస్తున్నారు.