ఇంకో ట్విస్ట్.. అనుష్క కూడా పోలీసే

ఓ సినిమా స్టోరీలో బోలెడన్ని ట్విస్టులు ఉండడం చూస్తూనే ఉంటాం. ఊహించని విధంగా ట్విస్టులు ఇచ్చి ఆడియన్స్ ను థ్రిల్ చేసి - సక్సెస్ సాధించేందుకు దర్శకులు - కథా రచయితలు ఆలోచిస్తుంటారు. అయితే.. టాలీవుడ్ బ్యూటీ అనుష్క నెక్ట్స్ మూవీ విషయంలో మాత్రం ముందునుంచి ట్విస్టులు వస్తూనే ఉన్నాయి. పిల్ల జమిందార్ ఫేమ్ అశోక్ దర్శకత్వంలో భాగమతి అనే సినిమాలో అనుష్క నటిస్తున్న విషయం తెలిసిందే.

ఈ భాగమతిలో అనుష్క ఓ పోలీస్ పాత్రలో నటిస్తోందనే విషయం ఇండస్ట్రీకి షాక్ కలిగించింది. అప్పట్లో విజయశాంతి - రోజా - మాలాశ్రీల తర్వాత ఈ రేంజ్ లో లేడీ పోలీస్ పాత్రతో లేడీ ఓరియెంటెడ్ మూవీ ఎవరూ తీయలేదు. అసలు దీనికి ముందే ఈ మూవీ గురించి చాలా ట్విస్టులు వచ్చాయి. మొదట ఈ సినిమాని చారిత్రకం అనుకున్నారు. భాగ్యనగరానికి మూలం అయిన భాగమతి కేరక్టర్ అనుకుంటే.. సినిమా స్టార్టింగ్ కి ముందు ఇది సామాజిక చిత్రమే అన్నారు.

ఆ తర్వాత అనుష్క ఇంట్రెస్ట్ చూపించకపోతే.. ప్రభాస్ ఎంట్రీ అయ్యి డీల్ ఫైనల్ చేశాడనే న్యూస్ వచ్చింది. రీసెంట్ గా ఈ మూవీ సెట్స్ నుంచి ఫిమేల్ కమెడియన్ విద్యుల్లేఖ.. తాను ఈ భాగమతిలో పోలీస్ పాత్రలో నటిస్తున్నానని.. అది కూడా కామెడీ పోలీస్ రోల్ అంటూ.. సెట్స్ నుంచే ఓ ఫోటో విడుదల చేసింది. ఇప్పుడు అనుష్క కూడా పోలీసే అంటున్నారు. చూద్దాం రిలీజయ్యే లోపు మరెన్ని ట్విస్టులు ఇస్తారో.