నాని హీరోయిన్ కు అనుష్క ఆఫర్

సినిమా ఫీల్డులో సక్సెస్ రేట్ చాలా తక్కువ. అందుకే ఇక్కడ ఓ సక్సెస్ వచ్చిందంటే చాలు.. అందులో నటించిన నటీనటులు - టెక్నీషియన్ల దశ తిరిగిపోతుంది. సెంటిమెంటుగా ఫీలై వాళ్లకు పిలిచి మరీ అవకాశాలిచ్చేస్తారు. పైగా తొలి సినిమాతోనే అందం, అభినయం చూపించిన హీరోయిన్ల సంగతి చెప్పాల్సిన పని లేదు. ‘కృష్ణగాడి వీర ప్రేమ గాథ’ హీరోయిన్ మెహ్రీన్ ఈ కోవలోకే చేరిపోయింది. ఆమె పెర్ఫామెన్స్ ఆకట్టుకుంది. సినిమా కూడా హిట్టయింది. ఇక అవకాశాలకు కొదవేముంది చెప్పండి. ఆల్రెడీ పూరి జగన్నాథ్-కళ్యాణ్ రామ్ సినిమాలో హీరోయిన్‌ గా ఎంపికైంది. మరోవైపు సాయిధరమ్ తేజ్ హీరోగా రైటర్ కమ్ డైరెక్టర్ బి.వి.ఎస్.రవి దర్శకత్వంలో రాబోయే సినిమాలోనూ ఆమే హీరోయిన్ అంటున్నారు. మరోవైపు మెహ్రీన్ కు బాలీవుడ్ లోనూ మంచి అవకాశాలు వస్తుండటం విశేషం.

ఓ క్రేజీ మూవీతో మెహ్రీన్ బాలీవుడ్ లో అరంగేట్రం చేయబోతోంది. స్టార్ హీరోయిన్ అనుష్క శర్మ నిర్మించబోయే ‘ఫిల్లౌరి’ సినిమాలో మెహ్రీన్ కీలక పాత్ర పోషించబోతోంది. ఇందులో అనుష్క కూడా ఓ ముఖ్య పాత్ర చేస్తోంది. పంజాబీ నటుడు దిల్జీత్ దోశాంజ్ కథానాయకుడిగా నటిస్తాడు. ఓ పంజాబీ పెళ్లి నేపథ్యంలో సాగే సినిమా ఇది. మెహ్రీన్ కూడా పంజాబీ అమ్మాయే కావడం కూడా ఈ సినిమాకు ఆమెను ఎంచుకోవడానికి కారణమైంది. ఈ చిత్రానికి దర్శకుడెవరన్నది ఇంకా వెల్లడి కాలేదు. అనుష్క ఆల్రెడీ ‘ఎన్ హెచ్ 4’ సినిమాతో నిర్మాతగా మారింది. ఆ సినిమా మంచి ఫలితాన్నందుకుంది. అనుష్కకు డబ్బులు తెచ్చిపెట్టింది. ఈ ఊపులో రెండో సినిమా మొదలుపెట్టేస్తోందామె.