వీడియో: వివాదంతో ప్ర‌చారం త‌స్స‌దియ్యా

వివాదంతో ప్ర‌చారం.. నేటి ట్రెండ్. చాలా కాలంగా రామ్ గోపాల్ వ‌ర్మ ఈ టెక్నిక్ ని తెలివిగా ఉప‌యోగిస్తున్నా ఇత‌రులు అల‌వాటు ప‌డ‌టానికి స‌మ‌యం ప‌ట్టింది. ఇప్పుడు అంద‌రూ ఆర్జీవీ బాట‌నే అనుస‌రిస్తున్నారు. ఏదో ఒక సంచ‌ల‌నం సృష్టించ‌నిదే త‌మ సినిమాకి ప్ర‌చారం స‌రిగా లేద‌ని భావించే ప‌రిస్థితి ఉందిప్పుడు. అలాగే వివాదాల్లో న‌లిగిన‌ప్పుడే ఆ సినిమాలో ఇంకేదో సంథింగ్ ఉంద‌ని జ‌నం థియేట‌ర్ల వైపు అడుగులు వేస్తున్నారు.

ఇప్పుడు ఆర్జీవీ బాట‌లోనే బాలీవుడ్ స్టార్ హీరోయిన్ అనుష్క శ‌ర్మ లేటెస్ట్ స్టంట్ హాట్ టాపిక్ గా మారింది. స‌రిగ్గా రెండు రోజుల క్రిత‌మే.. పాపుల‌ర్ బ్రాండెడ్ షూస్ కంపెనీని అనుష్క శ‌ర్మ విమ‌ర్శించ‌డం వేడెక్కించింది. అయితే ఇది కేవ‌లం ప్రమోషనల్ స్టంట్ అని అర్థం చేసుకునేందుకు ఎంతో స‌మ‌యం ప‌ట్ట‌లేదు. ఇప్పుడు అనుష్క శ‌ర్మ పాపుల‌ర్ షూ బ్రాండ్ ప్ర‌క‌ట‌న‌లో న‌టించిన‌ప్ప‌టి ఫోటోలు వైర‌ల్ గా మారుతున్నాయి. వీటిలో అనుష్క పూర్తి ఫిట్ గా క‌నిపిస్తోంది. గ‌ర్భ‌ధార‌ణ త‌ర్వాత త‌న‌కు ఇది తొలి అవ‌కాశమే అయినా ఈ ట్రాన్స్ ఫ‌ర్మేష‌న్ ఉత్కంఠను క‌లిగించింది. త‌దుప‌రి వ‌రుస చిత్రాల్లో న‌టించేందుకు త‌న‌ను తాను ఫిట్ గా మ‌లుచుకుని టోన్డ్ బాడీతో అనుష్క శ‌ర్మ షాకిచ్చింద‌ని చెప్పాలి.

అయితే దీనిపై స‌ద‌రు షూ బ్రాండ్ స్పందిస్తూ తాము (పూమా+అనుష్క) కలిసి కొన్ని విషయాలను అధికారికంగా ప్రకటించాల్సి ఉంద‌ని పేర్కొంది. సోమవారం నాడు అనుష్క తన సిబ్బందిని స‌ద‌రు బ్రాండ్ ఆఫర్ ను స్వీకరించాలా వ‌ద్దా? అని ప్ర‌శ్నించిన వీడియో బ‌య‌ట‌ప‌డింది. దీంతో ఈ బ్రాండ్ ప్ర‌చారం కోస‌మే ఇదంతా అని అర్థ‌మైంది.

నిజానికి అనుష్క శ‌ర్మ మ‌హిళా క్రికెట‌ర్ గా న‌టిస్తున్నందున ప‌బ్లిసిటీ స్టంట్ ని ఆస‌క్తిక‌రంగా కొన‌సాగించారు. దీనిని బ‌ట్టి ఈ షూ బ్రాండ్ చాలావ‌ర‌కూ ఇన్-ఫిల్మ్ బ్రాండింగ్ చేస్తోందని పుకార్లు వినిపిస్తున్న నేపథ్యంలో బ్రాండ్ అంబాసిడర్ గా సద‌రు పాపుల‌ర్ బ్రాండ్ కోసం అనుష్క‌ ఇప్పటికే సంతకం చేసినట్లు కనిపిస్తోంది. ఇక ప్రేక్షకులను ఆశ్చర్యానికి గురి చేసేందుకు సోషల్ మీడియాలో ర‌క‌ర‌కాల మార్ఫ్ డ్ ఫోటోల‌తో ర‌క్తి క‌ట్టించారు.

కెరీర్ మ్యాట‌ర్ ని ప‌రిశీలిస్తే.. అనుష్క చివరిసారిగా 2018 చిత్రం 'జీరో'లో కనిపించింది. షారుఖ్ ఖాన్- కత్రినా కైఫ్ ల‌తో కలిసి ఈ చిత్రంలో నటించారు. ఆ త‌ర్వాత‌ నిర్మాతగా అనేక హిట్ సినిమాలకు అనుష్క స‌మ‌ర్ప‌కురాలిగా వ్య‌వ‌హ‌రించింది. ఇప్పుడు అనుష్క న‌టిగా తన చిత్రం 'చక్దా ఎక్స్ ప్రెస్‌'తో తిరిగి బ‌రిలో దిగేందుకు సిద్ధంగా ఉంది. ఇది భారత మాజీ క్రికెటర్ ఝులన్ గోస్వామి జీవితం ఆధారంగా స్పోర్ట్స్ బయోపిక్ కేట‌గిరీలో తెర‌కెక్కుతోంది. దీనిని నెట్ ఫ్లిక్స్ లో ప్రీమియర్ చేస్తారు. ఇటీవల విడుదలైన ఖలా చిత్రంలో కూడా కనిపించింది, ఇందులో అనుష్క‌ అతిధి పాత్రలో కనిపించింది.


నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.