స్వీటీ శెట్టి - నవీన్ పోలిశెట్టి సినిమా సెట్స్ పైకి వెళ్ళేది అప్పుడేనా..?

అగ్ర కథానాయిక అనుష్క - యువ కథానాయకుడు నవీన్ పోలిశెట్టి కాంబినేషన్ లో ఓ సినిమా తెరకెక్కనుందని కొంత కాలంగా వార్తలు వినిపిస్తున్నాయి. పెద్ద హీరోతో కాకుండా అనుష్క ఓ యంగ్ హీరో సరసన నటించడం ఏంటని అందరూ ఆశ్చర్యం వ్యక్తం చేశారు. అయితే ‘నిశ్శబ్దం’ తర్వాత నిశబ్దంగా ఉంటూ వస్తున్న స్వీటీ శెట్టి.. తదుపరి సినిమా ఇదేనని తెలుస్తోంది. 'రా రా కృష్ణయ్య' ఫేమ్ మహేష్ ఈ చిత్రానికి దర్శకత్వం వహించనున్నారు. యూవీ క్రియేష‌న్స్ బ్యానర్ లో ఈ సినిమా రూపొందనుంది.

ఇప్పటికే ప్రీ ప్రొడక్షన్ పనులు పూర్తి చేసుకున్న ఈ చిత్రాన్ని ఏప్రిల్ మూడో వారం నుంచి సెట్స్ పైకి తీసుకెళ్లాలని మేకర్స్ ముందుగా ప్లాన్ చేసుకున్నారు. కానీ కరోనా సెకండ్ వేవ్ కారణంగా షూటింగ్ ప్రారంభం కాలేదు. అయితే ఇప్పుడు షూటింగ్ లకు అనుమతి వస్తే ఈ ప్రాజెక్ట్ ని పట్టాలెక్కించడానికి చిత్ర యూనిట్ సన్నాహాలు చేస్తోందని తెలుస్తోంది. అన్నీ అనుకున్నట్లు జరిగితే జూన్ చివరి వారం నుంచి అనుష్క శెట్టి - నవీన్ పోలిశెట్టి సినిమా మొదలయ్యే అవకాశాలు ఉన్నాయని సమాచారం.

ఇకపోతే ఈ చిత్రానికి ఇద్దరి పేర్లు కలిసొచ్చేలా ''మిస్ శెట్టి.. మిస్టర్ పోలిశెట్టి" అనే టైటిల్ పరిశీలిస్తున్నట్లు తెలుస్తోంది. తన కంటే వయసులో చాలా పెద్దదైన ఓ మహిళ ప్రేమలో పడే కుర్రాడి కథాంశంతో ఈ రొమాంటిక్ డ్రామా రూపొందనుందని టాక్ వినిపిస్తోంది. 'ఏజెంట్ సాయి శ్రీనివాస ఆత్రేయ' 'జాతిర‌త్నాలు' వంటి వరుస విజయాలతో జోష్ లో ఉన్న నవీన్ పోలిశెట్టి.. తన కంటే చాలా సీనియర్ అయిన స్వీటీ శెట్టితో కలిసి హ్యాట్రిక్ హిట్ కొడతాడేమో చూడాలి.