రాజీనామాల ఆమోదం! `మా` బిల్డింగ్ పై వారంలోనే!!

మూవీ ఆర్టిస్టుల సంఘం (మా) ఎన్నిక‌ల హంగామా ముగిసి ఇప్పుడిప్పుడే స‌న్నివేశం స‌ద్ధుమ‌ణుగుతోంది. అయితే ఇంత‌లోనే రాజీనామాల్ని ఆమోదిస్తున్నాం! అంటూ అధ్య‌క్షుడు మంచు విష్ణు బాంబ్ పేల్చారు. ఇంత‌కీ అస‌లేమైంది? అంటే..

మా అసోసియేష‌న్ ఎన్నిక‌ల్లో విష్ణు గెలుపొందిన అనంత‌రం ప్ర‌కాష్ రాజ్ ప్యానెల్ రాజీనామా చేస్తున్నామ‌ని ప్ర‌క‌టించింది. ప్రకాష్‌ రాజ్‌ ప్యానెల్ నుంచి గెలుపొందిన శ్రీ‌కాంత్‌- ఉత్తేజ్ స‌హా మొత్తం 11 మంది స‌భ్యులు రాజీనామా చేశారు. అలా చేయొద్ద‌ని వారించినా వారు అంగీక‌రించ‌లేదు.. అందుకే ఇప్పుడు ఆమోదించాల్సొచ్చింద‌ని విష్ణు అన్నారు.

ప్రకాష్‌ రాజ్‌- నాగబాబు `మా` సభ్యత్వానికి రాజీనామా చేసినా కానీ దానిని ఆమోదించ‌లేద‌ని మంచు విష్ణు అన్నారు. ఇక ఎంతో కీల‌క‌మైన మూవీ ఆర్టిస్టుల సంఘం (మా) సొంత భ‌వంతి నిర్మాణంపైనా చర్చలు జరుగుతున్నాయని.. వారం- పదిరోజుల్లో నిర్ణయం తీసుకుని ప్రకటన చేస్తామని మంచు విష్ణు వెల్ల‌డించారు. కొత్త యువ అధ్య‌క్షుడు ప్ర‌తి నిర్ణయాన్ని ఎంతో దూకుడుగా తీసుకుంటున్నారు. ఈ త‌డ‌వ‌(పాల‌నా సీజ‌న్) సొంత భ‌వంతి క‌ల‌ను నెర‌వేర్చ‌డం ఖాయంగానే క‌నిపిస్తోంది. ముర‌ళీమోహ‌న్ - నాగ‌బాబు - రాజేంద్ర ప్ర‌సాద్- శివాజీరాజా వంటి పాత‌ అధ్య‌క్షులు నెర‌వేర్చ‌లేనిది మంచు విష్ణు నెర‌వేరుస్తార‌నే అంతా ఆశిస్తున్నారు. నేటిత‌రం హార్స్ ప‌వ‌ర్ స్పీడ్ పైనా ఆస‌క్తిగా ముచ్చ‌టించుకుంటున్నారంతా.