చైతూకు కలెక్షన్స్‌ - సమంతకు ప్రశంసలు

అక్కినేని హీరో నాగచైతన్య తాజాగా ‘శైలజా రెడ్డి అల్లుడు’ చిత్రంతో ప్రేక్షకుల ముందుకు వచ్చిన విషయం తెల్సిందే. భారీ అంచనాల నడుమ రూపొందిన ఈ చిత్రం ఆశించిన స్థాయిలో లేదు అంటూ కాస్త నెగటివ్‌ రివ్యూలు వచ్చిన విషయం తెల్సిందే. సినిమాకు నెగటివ్‌ రివ్యూలు వచ్చినా కూడా కమర్షియల్‌ ఎలిమెంట్స్‌ బాగున్నాయనే టాక్‌ ప్రేక్షకుల నుండి వస్తున్న కారణంగా మంచి వసూళ్లు నమోదు అవుతున్నాయి. నాగచైతన్య కెరీర్‌ లోనే అత్యధికంగా ఈ చిత్రం వసూళ్లు సాధిస్తున్నట్లుగా చిత్ర యూనిట్‌ సభ్యులు చెబుతున్నారు. ఓవర్సీస్‌ లో ‘మనం’ కంటే ఎక్కువగా ఈ చిత్రం రాబట్టింది. ఇక శైలజా రెడ్డి అల్లుడు చిత్రం విడుదలైనే రోజే సమంత నటించిన ‘యూటర్న్‌’ చిత్రం కూడా ప్రేక్షకుల ముందుకు వచ్చిన విషయం తెల్సిందే.

సమంత ‘యూటర్న్‌’ చిత్రంకు విశ్లేషకుల నుండి ప్రశంసలు దక్కాయి. మంచి రివ్యూలతో పాటు - మంచి రేటింగ్‌ దక్కించుకున్న యూటర్న్‌ చిత్రంకు కలెక్షన్స్‌ మాత్రం అంతగా రావడం లేదు. ముందు నుండి అనుకుంటున్నట్లుగా ఈచిత్రం థ్రిల్లర్‌ ఎలిమెంట్స్‌ తో తెరకెక్కిన కారణంగా ఫ్యామిలీ ఆడియన్స్‌ మరియు మాస్‌ ఆడియన్స్‌ ఈ చిత్రంను చూసేందుకు అంతగా ఆసక్తి చూపట్లేదు అంటూ ట్రేడ్‌ విశ్లేషకులు అభిప్రాయం వ్యక్తం చేస్తున్నారు. సమంత ‘యూటర్న్‌’ చిత్రంను కేవలం థ్రిల్లర్‌ సినిమాలను ఇష్టపడే వారు మాత్రమే చూస్తున్నారని తెలుస్తోంది.

‘యూటర్న్‌’కు పాజిటివ్‌ రివ్యూలు వచ్చిన కారణంగా సినిమాకు లాంగ్‌ రన్‌ లో మంచి కలెక్షన్స్‌ వస్తాయని విశ్లేషకులు అభిప్రాయం వ్యక్తం చేస్తున్నారు. శైలజారెడ్డి అల్లుడు జోరు తగ్గిన వెంటనే మరే పెద్ద సినిమాలు లేవు కనుక యూటర్న్‌ కు ప్రేక్షకులు టర్న్‌ అయ్యే అవకాశం ఉందని తెలుస్తోంది. తెలుగుతో పాటు తమిళంలో కూడా ఇదే పరిస్థితి అంటూ మార్కెట్‌ వర్గాల వారు విశ్లేషిస్తున్నారు. బాక్సాఫీస్‌ వద్ద పోటీ పడ్డ సమంత చైతూల్లో ఇద్దరు కూడా సగం సగం సక్సెస్‌ దక్కించుకున్నట్లుగా సినీ వర్గాల వారు అభిప్రాయం వ్యక్తం చేస్తున్నారు.