రెహమాన్ ఎవరికి మ్యూజిక్ ఇస్తున్నాడు?

రెహమాన్ సంగీత వారసత్వాన్ని అందుకుని కోలీవుడ్ లోకి అడుగుపెట్టాడు జి.వి.ప్రకాష్ కుమార్. ముందు సినిమాల్లోకి రావడానికి రెహమాన్ పేరు ఉపయోగపడిందేమో కానీ.. ఆ తర్వాత మాత్రం తన మావయ్య పేరును ఎక్కడా వాడుకోలేదు ప్రకాష్. టీనేజీలోనే తన టాలెంట్ ఏంటో చూపించాడు. కోలీవుడ్ స్టార్ మ్యూజిక్ డైరెక్టర్లలో ఒకడిగా ఎదిగాడు. అప్పుడే మ్యూజిక్ డైరెక్టర్ గా 50 సినిమాలు పూర్తి చేసేశాడు. గత ఏడాది హీరోగా కూడా అరంగేట్రం చేసి.. మంచి విజయాలందుకున్నాడు. ప్రస్తుతం కోలీవుడ్ లో సంగీత దర్శకుడిగా, హీరోగా.. రెండు విధాలా హవా సాగిస్తున్నాడు జి.వి.

ప్రస్తుతం ప్రకాష్ హీరోగా మూడు సినిమాలు నిర్మాణంలో ఉండటం విశేషం. ఇప్పుడు అతడికి ఇంకో బంపర్ ఆఫర్ తగిలింది. దర్శకుడిగా మెరుపు కలలు - ప్రియురాలు పిలిచింది లాంటి వైవిధ్యమైన సినిమాలు తీసిన టాప్ సినిమాటోగ్రాఫర్ రాజీవ్ మీనన్.. దాదాపు దశాబ్దంన్నర విరామం తర్వాత మళ్లీ మెగా ఫోన్ పట్టబోతున్నాడు. ఈ చిత్రానికి జి.వి.ప్రకాష్ కుమార్ నే హీరోగా ఎంచుకోవడం విశేషం. ఐతే తన గత రెండు సినిమాల మాదిరే ఈ చిత్రానికి కూడా ఎ.ఆర్.రెహమాన్ తోనే మ్యూజిక్ చేయించుకోవాలని భావిస్తున్నాడు రాజీవ్. రెహమాన్ కూడా అందుకు ఓకే చెప్పాడట. దీంతో తన మేనల్లుడి సినిమాకు రెహమాన్ మ్యూజిక్ ఇవ్వబోతుండటం ఖాయం అయింది. చాలా చిత్రమైన కాంబినేషన్ కదా ఇది.