విజ‌య్ స‌రే బ‌న్నిని కేర్ చేయ‌డేం?

స్వ‌ర‌మాంత్రికుడు ఏ.ఆర్‌.రెహ‌మాన్‌ కి ప్ర‌పంచ‌వ్యాప్తంగా వీరాభిమానులున్నారు. ప్ర‌పంచంలోనే శూన్యం నుంచి సంగీత ధ్వ‌నుల్ని క్రియేట్ చేయ‌గ‌లిగే అరుదైన మ్యూజిక్ డైరెక్ట‌ర్‌ గా అత‌డి పాపులారిటీనే వేరు. కెరీర్ ఆరంభం సౌత్ సినిమాల‌కు సంగీతం అందించిన రెహ‌మాన్ కాల‌క్ర‌మంలో బాలీవుడ్‌ కి అట్నుంచి హాలీవుడ్‌ కి అంకిత‌మైపోయాడు. మ్యూజిక్ కాన్సెర్టుల పేరుతో భారీగా సంపాద‌న‌కు అల‌వాటు ప‌డి పాశ్చాత్య దేశాల టూర్‌ ల‌తో బిజీ అయిపోయాడు. అయితే ఆ ప్ర‌భావం ఓ ర‌కంగా సౌత్‌ పై ప‌డింద‌నే చెప్పాలి. ఇక్క‌డ తూతూగా వినిపించే బాణీలు రెహ‌మాన్ అభిమానుల‌కు బోర్ కొట్టించాయి.

ఇక రెహమాన్‌ లో వేరొక కోణం ప‌రిశీలిస్తే - సౌత్‌ లో అత‌డు సంగీతం అందిస్తే అది కేవ‌లం త‌మిళ సినిమా వ‌ర‌కే ప‌రిమితం. తెలుగు సినిమాల వైపు అత‌డి చూపు ప్ర‌స‌రించ‌డ‌మే అరుదు. అపుడెపుడో ప‌వ‌న్‌ క‌ల్యాణ్ `కొమ‌రం పులి`కి సంగీతం అందించిన రెహ‌మాన్ తెలుగు సినిమాలు చేయ‌డానికి ఇష్ట‌ప‌డ‌డం లేదు. ఇటీవ‌ల మెగాస్టార్ చిరంజీవి `సైరా-న‌ర‌సింహారెడ్డి`కి ఓకే చెప్పి మ‌రీ త‌ర్వాత కాద‌న్నాడు. త‌మిళంలో విజ‌య్- మురుగ‌దాస్‌ ల క్రేజీ చిత్రం `స‌ర్కార్‌`కి ప్ర‌స్తుతం సంగీతం అందిస్తున్నాడు. ఈ సినిమా ఆడియోని సెప్టెంబ‌ర్‌ లో రిలీజ్ చేసేందుకు స‌న్నాహాలు చేస్తోంది టీమ్‌. ఈ ఆడియోలో రెహ‌మాన్ & టీమ్ లైవ్ కాన్సెర్టును నిర్వ‌హించ‌నుందిట‌. అయితే విజ‌య్‌ కి ఇంత చేస్తున్న రెహ‌మాన్ ఇటు తెలుగు సినిమాల‌కు ఎందుక‌ని అంగీక‌రించ‌డం లేదు? మెగాస్టార్‌ నే కాద‌న్నాడు స‌రే.. త‌దుప‌రి బ‌న్ని సినిమాకి అయినా అంగీక‌రిస్తాడా? రెహ‌మాన్ కోసం విక్ర‌మ్‌.కె.కుమార్ సీరియ‌స్‌ గా ట్రై చేస్తున్నాడు. ఈ సినిమాకి అంగీక‌రిస్తాడా.. లేదా? అన్న ఆస‌క్తిక‌ర చ‌ర్చ సాగుతోంది.