'అరణ్మనై 3' ట్రైలర్: భయపెట్టడానికి రెడీ అయిన ఆర్య - రాశీఖన్నా..!

హారర్ కామెడీ చిత్రాలకు ఓ వర్గం ప్రేక్షకులు ఎప్పుడూ ఉంటారు. రాఘవ లారెన్స్ - సుందర్ వంటి దర్శకులు ఈ జోనర్ లో సినిమాలు చేసి సూపర్ హిట్స్ అందుకున్నారు. కామెడీ - ఎమోషన్ - రొమాన్స్ వంటి అంశాలకు హారర్ ని జత చేసి సక్సెస్ అయ్యారు. 'అరణ్మనై' 'అరణ్మనై 2' వంటి చిత్రాలతో ప్రేక్షకులను మెప్పించిన తమిళ డైరెక్టర్ సుందర్.. ఇప్పుడు అదే ఫ్రాంచైజీలో ముచ్చటగా మూడోసారి ''అరణ్మనై 3'' సినిమాను రూపొందించాడు.

''అరణ్మనై 3'' చిత్రంలో ఆర్య - రాశి ఖన్నా - ఆండ్రియా ప్రధాన పాత్రలు పోషించారు. దసరా కానుకగా అక్టోబర్ 14వ తేదీన ఈ చిత్రాన్ని విడుదల చేస్తున్నారు. ఈ నేపథ్యంలో తాజాగా తమిళ ట్రైలర్‌ ను చిత్ర యూనిట్ రిలీజ్ చేసింది. రాజభవనాన్ని వెంటాడే ప్రేతాత్మ కథతో ఈ ట్రైలర్ ప్రారంభమవుతుంది. ఇది ఆ ప్యాలెస్ చుట్టూ తిరిగే ఆసక్తికరమైన కథ అనే విషయం అర్థమవుతోంది.

రాశీఖన్నా కు చిన్న వయసులోనే ఆ ప్యాలస్ లో ఆత్మ ఉందని తెలిసినప్పటికీ.. అది ఎవరికీ హాని చేయనందున దాన్ని పట్టించుకోనట్లు చూపించారు. అయితే కొందరు వ్యక్తులు పరిస్థితుల వల్ల ఆత్మ హింసాత్మకంగా మారినట్లు తెలుస్తోంది. రాశి తో ప్రేమలో పడిన వ్యక్తిగా ఆర్య నటించాడు. అతని శరీరంలోకి ఆ ఆత్మ ప్రవేశించినట్లు చూపించారు. 'అరణ్మనై 2' లో ఉన్న సుందర్.సి - ఆండ్రియా పాత్రలు ఇందులో కూడా కొనసాగాయి.

హారర్ ఎలిమెంట్స్ మరియు కొన్ని కామెడీ సన్నివేశాలతో కూడిన ''అరణ్మనై 3'' సినిమా ట్రైలర్ ఉత్కంఠకు గురి చేస్తుంది. విజువల్స్ - గ్రాఫిక్ వర్క్ చూస్తుంటే భారీ స్థాయిలో ఈ చిత్రాన్ని తీసినట్లు తెలుస్తోంది. దీనికి బ్యాగ్రౌండ్ స్కోర్ కూడా అదనపు ఆకర్షణగా నిలిచింది. యూకే సెంథిల్ కుమార్ ఈ చిత్రానికి సినిమాటోగ్రఫీ అందించగా.. సత్య సంగీతం సమకూర్చారు. ఈ చిత్రంలో సాక్షి అగర్వాల్ - సంపత్ రాజ్ - వివేక్ - యోగిబాబు - మనోబాల తదితరులు కీలక పాత్రల్లో కనిపించనున్నారు.

'అరణ్మనై' ప్రాంఛైజీలో ఇంతకుముందు వచ్చిన రెండు చిత్రాలను ‘కళావతి’ ‘చంద్రకళ’ పేర్లతో తెలుగులో విడుదల చేసిన సంగతి తెలిసిందే. ఈ సినిమాలు తమిళనాట మాత్రమే కాదు ఇక్కడ కూడా మంచి విజయాలను నమోదు చేసాయి. ఈ క్రమంలో వస్తోన్న ''అరణ్మనై 3'' సినిమా తమిళ్ లో సక్సెస్ అయితే.. త్వరలో తెలుగులో విడుదల చేసే అవకాశం ఉంది.