అంజలి గ్రాఫ్ పడిపోవటానికి కారణాలు అవేనా?

అంజలి .. అచ్చ తెలుగు అమ్మాయి. అయినా ముందుగా తమిళ ఇండస్ట్రీలో తన దూకుడు చూపించింది. అక్కడ వరుస సినిమాలతో దూసుకుపోయింది. ఆ సమయంలో ఉన్న యంగ్ హీరోలంతా తమ సినిమాల్లో ఆమెను తీసుకోమని దర్శక నిర్మాతలపై వత్తిడి తెచ్చిన సందర్భాలు ఉన్నాయి. అక్కడ సినిమాలు ఇక్కడ అనువాదాలుగా రావడంతోనే, ఇక్కడి నుంచి అంజలికి అవకాశాలు వెళ్లాయి. అప్పుడే ఆమె తెలుగులో సినిమాలు చేయడానికి రంగంలోకి దిగింది.

అసలే అంజలి చాలా చురుకైన అమ్మాయి .. ఇలా అవకాశం ఇస్తే అలా అల్లుకుపోతుంది. గలగలమని మాట్లాడుతూ తెరపై సందడి చేసింది. ఇక ఎదురుగా కెమెరా ఉందనే విషయం గుర్తులేనట్టుగానే చాలా సహజంగా ఆమె నటన ఉండేది. ఇటు గ్లామర్ .. అటు నటన పుష్కలంగా ఉండటంతో, యూత్ లో ఆమెకి విపరీతమైన ఫాలోయింగ్ ఏర్పడింది. అప్పటివరకూ వచ్చిన తెలుగు హీరోయిన్ల కంటే అంజలి ఒక రెండు అడుగులు ముందుకు వెళ్లగలిగింది. అయితే ఎంత ఫాస్టుగా అంజలి కెరియర్ గ్రాఫ్ పెరుగుతూ వెళ్లిందో, అంతే వేగంగా ఆ గ్రాఫ్ పడిపోతూ వచ్చింది.

అంజలి అందం .. అభినయంతో పాటు ఆమె అల్లరిని ప్రేక్షకులు ఎక్కువగా ఇష్టపడ్డారు. అలాంటి అంజలికి అవకాశాలు తగ్గుతూ వచ్చాయి. చాలా తక్కువ సమయంలోనే ఆమె సీనియర్ హీరోల సరసన నటించడం, డిమాండ్ తగ్గిన తరువాత చేయవలసిన హారర్ థ్రిల్లర్ సినిమాలను ముందుగానే చేసేయడం .. అదే సమయంలో ఐటమ్ సాంగ్స్ చేయడానికి సిద్ధపడటం చేస్తూ వచ్చింది. అలాంటి తొందరపాటు నిర్ణయాల కారణంగానే అంజలికి అవకాశాలు తగ్గుతూ వచ్చాయనే టాక్ వినిపిస్తోంది. లేదంటే హీరోయిన్ గా మరికొంతకాలం పాటు తన జోరు కొనసాగేదేమో.