చరణ్ బర్త్ డే కానుకలు రెడీ చేస్తున్నారా..?

మెగా పవర్ స్టార్ రామ్ చరణ్ ప్రస్తుతం దర్శకధీరుడు రాజమౌళి తెరకెక్కిస్తున్న 'ఆర్.ఆర్.ఆర్' సినిమాలో ఎన్టీఆర్ తో కలిసి నటిస్తున్నారు. అలానే హోమ్ బ్యానర్ లో 'ఆచార్య' సినిమాలో తన తండ్రి మెగాస్టార్ చిరంజీవితో కలిసి స్క్రీన్ షేర్ చేసుకుంటున్నాడు. కొరటాల శివ ఈ చిత్రానికి దర్శకత్వం వహిస్తున్నాడు. 'ఆర్.ఆర్.ఆర్' సినిమా దసరా కానుకగా అక్టోబర్ 13న వస్తుండగా.. ఇక 'ఆచార్య' వేసవిలో మే 13న ప్రేక్షకుల ముందుకు రానుంది. ఇలా చరణ్ ఒకే ఏడాది రెండు సినిమాలతో వస్తున్నందుకు ఫ్యాన్స్ హ్యాపీగా ఫీల్ అవుతున్నారు. అలానే షూటింగ్స్ ఫైనల్ స్టేజీలో ఉన్న ఈ చిత్రాల నుంచి చెర్రీ పుట్టినరోజు సందర్భంగా అప్డేట్స్ వస్తాయని ఆశిస్తున్నారు.

చరణ్ మార్చి 27న బర్త్ డే సెలబ్రేట్ చేసుకోనున్నారు. లాస్ట్ ఇయర్ పుట్టినరోజు నాడు 'RRR' నుంచి అల్లూరి సీతారామరాజుగా చెర్రీ ఇంట్రో వీడియోని వదిలారు. 'భీమ్ ఫర్ రామరాజు' పేరుతో వచ్చిన ఈ టీజర్ రికార్డ్ వ్యూస్ అందుకుంది. ఈ క్రమంలో ట్రిపుల్ ఆర్ నుంచి ఈ ఏడాది కూడా బర్త్ డే గిఫ్ట్ రెడీ అవుతోందట. రెగ్యులర్ గా అప్డేట్స్ ఇస్తూ వస్తున్న చిత్ర యూనిట్.. చరణ్ కోసం స్పెషల్ పోస్టర్ లేదా ఓ గ్లిమ్స్ రిలీజ్ చేసే అవకాశాలు ఉన్నాయని అంటున్నారు. అలానే 'ఆచార్య'లో చరణ్ పోషిస్తున్న 'సిద్ధ' పాత్రకు సంబంధించిన టీజర్ కూడా సిద్ధం చేస్తున్నారట. ఇప్పటికే చెర్రీ పార్ట్ షూట్ కంప్లీట్ కావడంతో కచ్చితంగా ట్రీట్ ఉంటుందని ఫ్యాన్స్ భావిస్తున్నారు.

ఇదే క్రమంలో రామ్ చరణ్ ఇటీవలే స్టార్ డైరెక్టర్ శంకర్ దర్శకత్వంలో ఓ భారీ ప్రాజెక్ట్ అనౌన్స్ చేసిన విషయం తెలిసిందే. తన కెరీర్ లో వస్తున్న ఈ 15వ చిత్రాన్ని దిల్ రాజు నిర్మించనున్నారు. బర్త్ డే నాడు 'RC15' కు సంబంధించిన ఏదైనా సర్ప్రైజ్ ఉంటుందని ఎక్సపెక్ట్ చేస్తున్నారు. ఏదేమైనా కానుకలతో చరణ్ బర్త్ డే మరింత స్పెషల్ గా మారుతుందని మెగా అభిమానులు ఫిక్స్ అయిపోయారు. మరి చరణ్ కోసం ఎలాంటి గిఫ్ట్స్ రెడీ చేస్తున్నారో చూడాలి.