అర్జున్ రెడ్డి దర్శకుడి 'యానిమల్' షూటింగ్ షురూ..!

దర్శకుడు సందీప్ రెడ్డి వంగా గురించి ప్రత్యేక పరిచయాలు అవసరం లేదు. 'అర్జున్ రెడ్డి' సినిమాతో సెన్సేషన్ క్రియేట్ చేసి.. ఒక్క సినిమాతోనే టాక్ ఆఫ్ ది ఇండస్ట్రీగా మారిపోయాడు. అదే చిత్రాన్ని 'కబీర్ సింగ్' పేరుతో హిందీలో రీమేక్ చేసి బ్లాక్ బస్టర్ హిట్ అందుకున్నాడు.

దీంతో సౌత్ లోనే కాకుండా బాలీవుడ్ లోనూ క్రేజీ డైరెక్టర్ గా మారిపోయాడు. ఈ నేపథ్యంలో కాస్త గ్యాప్ తీసుకున్న సందీప్ వంగా.. తొలిసారిగా బాలీవుడ్ స్టార్ రణబీర్ కపూర్‌ తో కలిసి ''యానిమల్'' అనే భారీ ప్రాజెక్ట్ చేయడానికి రెడీ అయ్యారు.

యాక్షన్ ఎంటర్‌టైనర్‌ గా రూపొందుతున్న 'యానిమల్' చిత్రాన్ని గతేడాది ప్రారంభంలోనే ప్రకటించారు. అయితే రణబీర్ ఇతర కమిట్ మెంట్స్ వల్ల ఆలస్యమవుతూ వచ్చింది. అయితే ఇవాళ శుక్రవారం ఈ సినిమాని పూజా కార్యక్రమాలతో లాంఛనంగా ప్రారంభించారు.

'యానిమల్' మూవీ రెగ్యులర్ షూటింగ్ ను కూడా ఈరోజు హిమాలయాల్లోని మనాలిలో మొదలుపెట్టినట్లు చిత్ర బృందం తెలిపింది. టైటిల్‌ కు తగ్గట్టుగానే ఈ సినిమాలో హీరో పాత్ర చాలా స్ట్రాంగ్ గా పవర్ ఫుల్ గా ఉంటుందని తెలుస్తోంది.

అంతేకాదు ఇందులో రణబీర్ కపూర్ ని పూర్తిగా భిన్నమైన పాత్రలో చూపించనున్నారు. దీని కోసం రణబీర్ మేకోవర్ అవుతున్నారు. రణబీర్ - సందీప్ వంగాల క్రేజీ కాంబినేషన్ లో రాబోతున్న ఈ ప్రాజెక్ట్‌ పై ఇప్పటికే తగినంత బజ్ క్రియేట్ అయింది.

'యానిమల్' ఒక పాన్ ఇండియా ప్రాజెక్ట్. ఇది అన్ని దక్షిణ భారత భాషలు మరియు హిందీలో విడుదల చేయబడుతుంది. ఈ సినిమాలో కొంతమంది ప్రముఖ నటీనటులు - అగ్రశ్రేణి సాంకేతిక నిపుణులు భాగం అవుతున్నారు.

రణబీర్ కపూర్ సరసన రష్మిక మందన్నా హీరోయిన్ గా నటించనుంది. బాబీ డియోల్ - అనీల్ కపూర్ వంటి బాలీవుడ్ స్టార్స్ కీలక పాత్రలు పోషించనున్నారు. గుల్షన్ కుమార్ సమర్పణలో టీ సిరీస్ - భద్రకాళి పిక్చర్స్ బ్యానర్స్ పై ఈ చిత్రాన్ని రూపొందిస్తున్నారు.

భూషణ్ కుమార్ - ప్రణయ్ రెడ్డి వంగా సంయుక్తంగా నిర్మిస్తున్న ఈ చిత్రానికి శాంతా సినిమాటోగ్రఫీ అందిస్తున్నారు. 'యానిమల్' మూవీని 2023 ఇండిపెండెన్స్ డే వీక్ లో ఆగస్ట్ 11న థియేటర్లలో విడుదల చేయనున్నట్లు మేకర్స్ ప్రకటించారు.