బాలీవుడ్ చిన్న‌వాడు అర్జున్ క‌పూర్‌?

వేరే భాష‌ల నుంచి సినిమాలు అరువు తెచ్చుకోవ‌డ‌మే అల‌వాటైన టాలీవుడ్.. గత కొన్నేళ్ల‌లో మారింది. వేరే భాష‌ల‌కు త‌న సినిమాల్ని అరువిస్తోంది. కొన్నేళ్ల నుంచి మ‌న సినిమాలు త‌ర‌చుగా వేరే భాష‌ల‌కు వెళ్తున్నాయి. గ‌త ఏడాది చివ‌ర్లో బ్లాక్ బ‌స్ట‌ర్ హిట్ట‌యిన చిన్న సినిమా ‘ఎక్క‌డికి పోతావు చిన్న‌వాడా’ ఇటు త‌మిళ ప‌రిశ్ర‌మ‌ను.. అటు బాలీవుడ్ ను ఆక‌ర్షించింది. త‌మిళంలో ఇప్ప‌టికే రీమేక్ కోసం స‌న్నాహాలు మొద‌ల‌య్యాయి. ఇప్పుడు బాలీవుడ్లోనూ రీమేక్ దిశ‌గా అడుగులు ప‌డుతున్నాయి. రెండు మూడు పెద్ద నిర్మాణ సంస్థ‌లు ఈ చిత్రాన్ని రీమేక్ చేయ‌డానికి ఆస‌క్తి చూపుతున్న‌ట్లుగా ద‌ర్శ‌కుడు వీఐ ఆనంద్ తెలిపాడు.

అన్నీ కుదిరితే ‘ఎక్క‌డికి పోతావు చిన్న‌వాడా’ హిందీ రీమేక్ కు త‌నే ద‌ర్శ‌క‌త్వం వ‌హిస్తాన‌ని ఆనంద్ చెప్పాడు. అర్జున్ క‌పూర్.. సోనాక్షి సిన్హాల‌తో ఈ చిత్రాన్ని రీమేక్ చేయాల‌న్న‌ది త‌న ఆలోచ‌న‌గా చెప్పాడు ఆనంద్. ఐతే ఇప్ప‌టిదాకా తాను రీమేక్ కోసం న‌టీన‌టులెవ‌రినీ సంప్ర‌దించ‌లేద‌ని చెప్పాడు. అవ‌కాశ‌ముంటే అర్జున్ క‌పూర్.. సోనాక్షిల‌తో ఈ సినిమా తీయాల‌న్న‌ది త‌న కోరిక అని చెప్పాడు. త‌మిళ రీమేక్ వ‌చ్చే నెల‌లోనే మొద‌ల‌వుతుంద‌ని.. ఐతే తెలుగులో ఈ చిత్రాన్ని నిర్మించిన పీవీ రావు వ‌చ్చే నెల‌లోనే త‌మిళ రీమేక్ ను మొద‌లుపెట్టాల‌నుకుంటున్నాడ‌ని.. ఐతే అల్లు శిరీష్ సినిమాను తాను మార్చిలోనే ఆరంభించాల్సి ఉన్న నేప‌థ్యంలో త‌మిళంలో తాను డైరెక్ట్ చేయ‌లేన‌ని చెప్పిన‌ట్లు ఆనంద్ తెలిపాడు. విజ‌య్ సేతుప‌తి.. జీవీ ప్ర‌కాష్ కుమార్.. శిబిరాజ్ రీమేక్ మీద ఆస‌క్తి చూపించిన‌ట్లు ఆనంద్ వెల్ల‌డించాడు. ఆనంద్ స్వ‌త‌హాగా త‌మిళుడే కావ‌డం విశేషం.


Like Us on Facebook : https://www.facebook.com/Tupakidotcom/